Franca mirëpret heqjen e barrikadave, pret marrëveshje

Vendimin për heqjen e barrikadave dhe shtensionimin e situatës në veri të vendit, e  ka mirëpritur ministria e Punëve të Jashtme e Francës, transmeton gazeta “Kosova Sot Online”.

Përmes një deklarate, Franca i ka bërë thirrje Kosovës dhe Serbisë që të vazhdojnë punën e tyre në drejtimin e uljes së tensioneve në mënyrë që të shkohet drejt marrëveshjes së përgjithshme

“Ne mirëpresim njoftimin për heqjen e shpejtë të pengesave në veri të Kosovës dhe përpjekjet e Bashkimit Europian dhe Shteteve të Bashkuara për të arritur këtë rezultat. I bëjmë thirrje autoriteteve serbe dhe kosovare që të vazhdojnë angazhimin e tyre konstruktiv për të ulur tensionet në terren dhe për të shkuar drejt një marrëveshjeje për normalizimin e marrëdhënieve të tyre në kuadër të dialogut të lehtësuar nga Bashkimi Evropian”.

Po ashtu, Franca tërheq vërejtjen se edhe marrëveshjet e deritanishme mes Kosovës dhe Serbisë të zbatohen.

“Të gjitha angazhimet e marra në kuadër të këtij dialogu duhet të zbatohen”.

(Kosova Sot Online)