Stoltenberg: NATO duhet të forcojë më tej mbështetjen për këtë shtet

NATO duhet të forcojë më tej mbështetjen e saj për Ukrainën, tha Sekretari i Përgjithshëm i NATO-s, Jens Stoltenberg në një konferencë për shtyp të martën.

“Ne jemi të vendosur ta çojmë partneritetin mes NATO-s dhe BE-së në një nivel tjetër”, tha Stoltenberg, i cili shtoi se Vladimir Putin i Rusisë kishte “dështuar” në përpjekjet e tij për të përçarë aleatët perëndimorë në lidhje me konfliktin në Ukrainë.

Të nxitur nga lufta në Ukrainë, zyrtarët e lartë të NATO-s dhe BE-së u zotuan të zgjerojnë bashkëpunimin midis dy institucioneve në një deklaratë të përbashkët të nënshkruar të martën në Bruksel.

Bashkëpunimi "është më i rëndësishëm se kurrë", tha Sekretari i Përgjithshëm i NATO-s Jens Stoltenberg pas nënshkrimit në selinë e aleancës së bashku me Presidenten e Komisionit Evropian Ursula von der Leyen dhe Presidentin e Këshillit Evropian Charles Michel.

“Ne duhet të vazhdojmë të forcojmë partneritetin midis NATO-s dhe Bashkimit Evropian dhe duhet të forcojmë më tej mbështetjen tonë për Ukrainën”, tha Stoltenberg.

Stoltenberg kujtoi një takim midis tre zyrtarëve disa orë pas pushtimit rus të Ukrainës shkurtin e kaluar për të theksuar marrëdhëniet e tyre të ngushta.

"Presidenti [rus] Putin donte të merrte Ukrainën brenda pak ditësh dhe të na përçante. Në të dyja pikat, ai ka dështuar qartë," tha ai.

Deklarata e Përbashkët e së Martës mbi Bashkëpunimin NATO-BE është një përpjekje e re për të çuar përpara bashkëpunimin midis institucioneve, duke u zotuar të përmirësojë përpjekjet bashkëpunuese për të mbrojtur infrastrukturën kritike.

NATO dhe BE synojnë gjithashtu të bashkëpunojnë në të ardhmen për implikimet e sigurisë të ndryshimeve klimatike, hapësirës, ndërhyrjes së huaj dhe manipulimit të informacionit, tha Stoltenberg.

Deklarata gjithashtu përmend Kinën në mënyrë eksplicite për herë të parë. "Vetëbesimi dhe politikat në rritje të Kinës paraqesin sfida që ne duhet t'i adresojmë," tha Stoltenberg.

(Kosova Sot Online)