Ja kujt i premton Kurti më shumë vëmendje

Bashkë më ministren e Drejtësisë, Albulena Haxhiu dhe ministrin e Financave, Punës dhe Transfereve, Hekuran Murati, kryeministri i Republikës së Kosovës, Albin Kurti, priti në takim në ndërtesën e Qeverisë përfaqësuesit e Qendrave për Punë Sociale, takim ky i pari që u organizua në një format të tillë nga Ministria e Drejtësisë, transmeton gazeta “Kosova Sot Online”.

“Kryeministri pasi përshëndeti të pranishmit dhe i falënderoi për angazhimin dhe punën e tyre, para tyre tregoi edhe synimet dhe veprimet që Qeveria planifikon në këtë aspekt, ku veçoi  themelimin e Grupit Punues në janar të vitit 2023 i cili do ta bëjë një analizë të detajuar të gjendjes në këto Qendra, në raport me përgjegjësitë, sfidat dhe kapacitetet njerëzore dhe profesionale. Më tej në kuadër të Agjendës Legjislative është paraparë projektligji për shërbimet sociale që parasheh një reformë të thellë në Qendrave për Punë Sociale, pasi edhe pse janë 38 qendra në të gjitha Komunat e Kosovës dhe ofrojnë më shumë se 70 shërbime për qytetarët, atyre asnjëherë nuk iu është dhënë vëmendja e duhur”, ka thënë Kurti.

Në njoftim thuhet se me këto dy dokumente qeveria synon fuqizimin e qendrave përmes shtimit të kapaciteteve, obligimin për profilizimin e stafit të tyre në mënyrë që të njëjtit të jenë në gjendje t’ju shërbejnë nevojave të qytetarëve sikurse edhe fuqizimin e mekanizmit të Inspektimit në rastet kur dyshohet për dështim të kryerjes së përgjegjësive.

(Kosova Sot Online)