Lajçak: Gjithçka që është nënshkruar, duhet të zbatohet
Gjithçka që është nënshkruar, duhet të zbatohet, ka theksuar i dërguari Special i BE-së për dialogun Kosovë-Serbi, Miroslav Lajçak, pas takimit me kryeministrin Albin Kurti, duke iu referuar çështjes së Asociacionit, transmeton gazeta “Kosova Sot Online”.
Lajçak tha se janë përmendur edhe gjashtë kushtet e parashtruara nga shefi i ekzekutivit.
Lajçak tutje tha se arsyeja e vizitës në Kosovë dhe ajo e takimit me kryeministrin Albin Kurti është çështja e planit evropian.I pyetur për çështjen e themelimit të Asociacionit të komunave me shumicë serbe ai tha se tashmë është e ditur se gjithçka që është nënshkruar, duhet të zbatohet.
“Janë përmendur edhe kushtet e Kurtit, për ne e rëndësishme është që të bëhen marrëveshje për normalizim të raporteve”, tha Lajçak.
Ai shtoi se sonte vizitën e tij do ta vazhdojë edhe në Beograd.
Kjo është vizita e 10-të që nga shtatori në Kosovë.
(Kosova Sot Online)