Osmani vendos: FSK në operacion humanitar pas tërmetit në Turqi

  • A.P /
  • 06 February 2023 - 19:21
Osmani vendos: FSK në operacion humanitar pas tërmetit në Turqi

Për ndihmë Republikës së Turqisë në tejkalimin e pasojave të tërmeteve të sotme, Presidentja Vjosa Osmani ka autorizuar dërgimin e Forcës së Sigurisë së Kosovës, transmeton gazeta “Kosova Sot Online”.

“Presidentja e Republikës së Kosovës, Vjosa Osmani, në cilësinë e komandantes supreme, në pajtim me kompetencat saj kushtetuese, ka nënshkruar autorizimin për dërgimin e trupave të Forcës së Sigurisë së Kosovës në operacion ndërkombëtar humanitar në Republikën e Turqisë për t’i mbështetur përpjekjet e autoriteteve turke për tejkalimin e pasojave tragjike të tërmeteve të sotme”, thuhet në një njoftim nga Presidenca.

Presidentja Osmani ka shprehur solidaritet të plotë me popullin e Turqisë dhe ka deklaruar se Republika e Kosovës do të vazhdojë të ofrojë mbështetjen e nevojshme.

Janë mbi 2,500 të vdekur deri tani dhe mijëra të lënduar nga tërmeti i fuqishëm që goditi Turqinë Jugore dhe pjesë të Sirisë në mëngjesin e sotshëm. 


(Kosova Sot Online)