Autobusi bie nga shkëmbi, 25 persona humbin jetën
Raportohet se 25 persona kanë humbur jetën dhe dhjetëra të tjerë kanë mbetur të plagosur si pasojë e një aksidenti rrugor në Pakistanin Verior.
Një autobus me 45 persona u përplas kokë më kokë me një fuoristradë dhe më pas u zhyt në një shkëmb në rrethin Kohistan.
Një zëdhënës i policisë ia atribuoi aksidentin shpejtësisë së tepërt nga shoferi i autobusit, sipas rrjetit të Pakistanit Dunya News.
Ky është aksidenti i dytë me vdekje brenda pak ditësh në të njëjtën provincë, e cila ndodhet pranë kufirit me Afganistanin. Të premten, 18 persona humbën jetën si pasojë e një përplasjeje kokë më kokë mes një autobusi dhe një kamioni.
(Kosova Sot Online)
