Kica-Xhelili për zhdukjen e mostrave të Deharit: Me këtë zhdukje të mostrave, ky rast mund të mos zgjidhet më kurrë

Deputetja e Lidhjes Demokratike të Kosovës (LDK), Doarsa Kica-Xhelili, ka thënë se “dikush deshti që rasti i Astrit Deharit të mos zgjidhet kurrë”, transmeton “Kosova Sot Online”.

Deputetja e LDK-së, ka shkruar se këto mostra a kanë humbur a po janë zhdukur me qëllim.

Ajo ka shkruar se “Dikush po mundohet të na krijoj bindjen që po na manipulohen”.

Këtë deputetja opozitare e tha pasi kanë humbur mostrat e Institutit të Mjekësisë Ligjore dhe të suspenduarit janë rikthyer në punë.

Postimi i plotë:

Kur drejtësia rrotullohet në varr!

Mostrat e Astrit Deharit të ndjerë, ende s’janë askund!

Zyrtarët e Institutit të Mjekësisë Ligjore që u suspenduan si të dyshuar, janë kthyer në punë. Aty ku GJITHÇKA mund të manipulohet.

A kanë humbur, apo janë zhdukur qëllimshëm mostrat? Apo, janë diku ku ka rrezik të tjetërsohen? Bëhen të papërdorshme? Apo, dikush po mundohet të na krijoj bindjen që po manipulohen? Dikush që nuk mundi ta pranoj të vërtetën sepse i dëmton politikisht? I implikon penalisht? Apo thjesht dikush që e kuptoi, më në fund, që e kishte pasur gjithë kohën gabim?

Me këtë zhdukje të mostrave, ky rast mund të mos zgjidhet më kurrë! Dikush nuk deshti që ky rast të zgjidhet! Kush, nuk e di, por di që e gjithë kjo po ndodh TANI! Në këtë qeverisje! Por, sot qeverisë nuk po i pengon kthimi i zyrtarëve të IML-së. Nuk po i pengojnë ditët që po kalojnë pa u gjetur mostrat. Sot diçka ka ndryshuar. Duken më të qetë. Sikur më në fund, ajo që ndryshoi, po i jep qetësi, edhe në qoftë se kjo nënkupton që nuk do të ketë kurrë drejtësi!

E, çka mbizotëron te pushteti e deputetët e shumicës? HESHTJA! Kjo heshtje, që dikur rrotullonte kamionë, dëmtonte institucione, e lëndonte policët tonë PIKËRISHT për skandalet si kjo. Pikërisht për KËTË rast!

E sot? Sot rrotullohet veç drejtësia në varr!

Doarsa Kica Xhelili

(Kosova Sot Online)