Tahiri: Kurti e fali Millosheviqin dhe Vuçiqin

Kryeministri Albin Kurti ka dështuar ta mbrojë shtetin e Kosovës në dialog, me pranimin e propozimit evropian, ka theksuar ish-kryenegociatorja e Kosovës në dialogun me Serbinë, Edita Tahiri, transmeton gazeta “Kosova Sot Online”;

Ajo thotë se Kurti e ka falur Millosheviqin dhe presidentin serb, Aleksandër Vuçiqin, duke u pajtuar me propozimin evropian për normalizimin e marrëdhënieve ndërmjet Kosovës e Serbisë.

“Ky plan nuk e ka njohjen reciproke… Pra është e dëmshme për Kosovën. Kurti si kryeministër nuk arriti të mbrojë shtetin e Kosovës në këtë dialog, u dorëzua para Vuçiqit. E dyta, është një marrëveshje e cila fare nuk parasheh historikun e luftërave, nuk parasheh as fajësinë e Serbisë si agresore në Kosovë. Pastaj fare nuk theksohet gjenocidi i Serbisë në Kosovë. Kurti fali Millosheviqin e Vuçiqin për gjenocidin në Kosovë, e të mos flasim që tani jemi në muajin mars, pra po fillojmë muajin e masakrave të asaj lufte. Marrëveshja nuk ka fare asnjë referencë për historikun e gjenocidit që ka ndodhur në atë kohë, s’ka fajësi”, ka thënë Tahiri ;

(Kosova Sot Online)