LDK: Heqja dorë nga njohja, përgjegjësi e Albin Kurtit
Ndërmjetësuesin e BE-së në dialogun Kosovë – Serbi, Miroslav Lajçak, e ka pritur në takim kryetari i LDK-së, Lumir Abdixhiku, transmeton gazeta “Kosova Sot Online”.
LDK përmes një komunikate, njofton se gjatë takimit u bisedua për ecurinë e procesit dialogues me theks të veçantë për propozimin evropian në lidhje me normalizimin e raporteve Kosovë-Serbi.
“LDK-ja i jep përkrahje procesit të dialogut, me ndërmjetësimin e BE-së dhe me përfshirjen e drejtpërdrejtë të ShBA-ve. LDK-ja rithekson se mbështet implementimin e të gjitha marrëveshjeve që janë arritur në këtë proces”.
Megjithatë, LDK-ja përsëri thotë se Kosovës i duhet një marrëveshje e përqendruar te njohja e ndërsjellë dhe se asnjë marrëveshje tjetër nuk garanton normalizim të marrëdhënieve Kosovë-Serbi.
“Heqja dorë nga njohja është përgjegjësi e drejtpërdrejtë e kryeministrit Kurti dhe e institucioneve të tjera kushtetuese të Kosovës”.
Në takim, LDK thotë se Abdixhiku i ka kërkuar Lajçakut sqarime në lidhje me tekstin e marrëveshjes së propozuar, në mënyrë të veçantë në lidhje me preambulën, me nenin 7, nenin 10 dhe me planin implementues të marrëveshjes së tanishme.
(Kosova Sot Online)