“Rreth 16 mijë shqiptarë kërkuan azil në Britani”- Ilir Meta: Tronditëse! Përgjegjësia e shpopullimit është e Ramës! Largimi i tij, domosdoshmëri
Kryetari i Partisë së Lirisë, Ilir Meta ka publikuar shifrat e Zyrës së Statistikave të Emigracionit në Mbretërinë e Bashkuar, ku 16 mijë shqiptarë kanë kërkuar azil në Britani.
Me anë të një postimi në Facebook, Meta thotë se ky është një fakt tronditës, ndërsa thekson se “të rinjtë shqiptarë ikin nga Shqipëria për shkak të qeverisjes së korruptuar 10 vjeçare të Edi Ramës”.
Përgjegjësia e shpopullimit të Shqipërisë, thotë Ilir Meta- është e Ramës, “ndaj largimi i tij është domosdoshmëri për shpëtimin e vendit!”
“Numri i aplikimeve për azil në Britaninë e Madhe nga shtetasit shqiptarë shënoi nivel rekord për vitin 2022!
Të dhënat më të fundit të publikuara nga Zyra e Statistikave të Emigracionit në Mbretërinë e Bashkuar tregojnë se rreth 16 mijë shqiptarë kërkuan azil në Britani dhe se 72% e tyre ishin më pak se 29 vjeç.
Tronditës është fakti se rreth 42% e aplikimeve janë bërë nga vetë të miturit si aplikantë kryesorë, ndërsa 13.7 % e kërkesave janë bërë nga fëmijë më pak se 18 vjeç.
Të rinjtë shqiptarë ikin nga Shqipëria, si nga asnjë vend tjetër i rajonit, për shkak të qeverisjes së korruptuar 10 vjeçare të Edi Ramës, që i ka detyruar t’u hipin gomoneve të shpresës, duke rrezikuar edhe jetën e tyre.
Përgjegjësia e shpopullimit të Shqipërisë është e Ramës, ndaj largimi i tij është domosdoshmëri për shpëtimin e vendit!
Më 14 Maj është dita për të ndëshkuar me votë përgjegjësin kryesor të shpopullimit!”.
(Kosova Sot Online)
