Hoti: Kjo urë paraqet rrezik për qarkullim

Urën mbi Drinin e Bardhë në Rogovë të Hasit, deputeti i LDK-së, Avdullah Hoti, ka njoftuar se e ka vizituar bashkë me deputetin Driton Selmanaj dhe anëtarë tjerë të LDK-së në Gjakovë, transmeton gazeta “Kosova Sot Online”.

Ai në një postim ka shkruar se sipas Komisionit të Ministrisë së Infrastrukturës, ura paraqet rrezik për qarkullim, duke shtuar se s’ është ndërmarrë asnjë veprim për riparimin e urës.

Hoti ka thënë se janë bllokuar disa projekte kapitale në Kosovë: “autostrada për Gjilan, rruga për Podujevë, rruga për Mitrovicë, rruga për Gjakovë, rruga Xërxë-Rahovec e shumë projekte të tjera”.

Ai është shprehur se këto projekte nuk janë prioritet për Qeverinë.

“Dëmet për qytetarë dhe për ekonominë nga vonesa në këto projekte të mëdha janë së paku tri herë më të mëdha se kostoja e këtyre projekteve, një shifër që shkon në 1 miliard euro.

Tanimë është e qartë se kjo qeveri nuk i ka prioritet këto projekte dhe nuk do t’i kryejë në mandatin e mbetur prej një viti e gjysmë. Kjo shihet edhe nga raporti i buxhetit për periudhën janar-mars 2023, ku pothuajse të gjitha projektet kapitale janë me shpenzime zero.

Për më tepër, jo vetëm që nuk i shpenzon mjetet e veta, por qeveria i ka bllokuar edhe shumë projekte të komunave duke mos ua bartuar mjetet vetanake.”

(Kosova Sot Online)