Osmani: Komunat në Republikën e Kosovës kanë të drejtë të mblidhen në Asociacione
Presidentja Vjosa Osmani, ka shprehur edhe pakënaqësi dhe zhgënjime rreth përmbajtjes së Marrëveshjes Bazë për normalizimin e raporteve Kosovë – Serbi dhe aneksit të saj, që njihet si Plani i Zbatimit, i pranuar më 18 mars në Ohër, transmeton gazeta “Kosova Sot Online”.
Sot, Presidentja, derisa fliste edhe njëherë për shkeljet që Serbia ua ka bërë marrëveshjeve, ajo u zotua se Kosova do t’i zbatojë ato.
“Sa i përket zbatimit të detyrimeve që dalin nga marrëveshjet e fundit në Bruksel dhe Ohër, ashtu siç kam thënë gjithnjë, më lejoni ta përsëris; Kosova nuk do t’u ikë detyrimeve të saj. Kosova do të zbatojë secilin detyrim për të cilin është pajtuar, si pjesë e këtij dialogu, përderisa e dimë të gjithë që marrëveshja thotë se të gjitha nenet e saj janë njësoj të rëndësishme”, tha Osmani.
Këta muaj, Presidentja Osmani nuk ka qenë më e kënaqura me marrëveshjet që janë arritur mes Kosovës dhe Serbisë. Së pari, pas arritjes së Marrëveshjes Bazë më 27 shkurt në Bruksel, ajo ka thënë se Kosova “ka pranuar një koncesion”, duke e pranuar nenin 7, që fliste për një “nivel adekuat të vetëmenaxhimit për komunitetin serb”.
Zbatimi i marrëveshjes që e arritën Kryeministri Albin Kurti dhe Presidenti serb, Aleksandër Vuçiq, nisi pikërisht prej nenit 7, pra nga themelimi i Asociacionit të komunave me shumicë serbe të Kosovës.
Presidentja Osmani tha sot se tubimi i komunave në Asociacione është një e drejtë kushtetuese dhe ajo duhet të behet siç parashihet në Kushtetutë, në një vendim të dalë nga Gjykata Kushtetuese në vitin 2015 dhe sipas një qëndrimi që e kanë shprehur dy zyrtarët e lartë amerikanë, Derek Chollet dhe Gabriel Escobar në një shkrim të përbashkët.
“Siç e dini, komunat në Republikën e Kosovës kanë të drejtë të mblidhen në Asociacione, për të koordinuar punën e tyre, por e gjithë kjo në përputhje të plotë me Kushtetutën e Republikës së Kosovës dhe me vendimin e Gjykatës Kushtetuese të vitit 2015, si dhe në përputhje me qëndrimin e shkruar të Qeverisë amerikane, të publikuar nga dy zyrtarët e Departamentit amerikan të Shtetit, z. Chollet dhe z. Escobar”, ka thënë Presidentja të hënën në një konferencë me dy senatorët.
Gjatë prillit, Osmani është deklaruar për një medium britanik “absolutisht e zhgënjyer” që marrëveshja nuk e përfshinte njohjen reciproke.
“Ne jemi absolutisht të zhgënjyer që njohja reciproke nuk përfshihet në mënyrë eksplicite në këtë marrëveshje, sepse kjo është zgjidhja e vetme që mund të çojë në paqe dhe stabilitet afatgjatë”, ka thënë Osmani për “The Sun”.
Ndërkaq, Presidentja është dukur e zhgënjyer edhe me aleatët perëndimorë për shkak se, siç thoshte ajo, Kosova është shtyrë në drejtim të pranimit të nenit 7, të cilin nuk e ka dashur.
“Kosova nuk e ka dashur nenin 7 në Marrëveshje. Kemi punuar me aleatët tanë përgjatë gjithë këtyre viteve dhe mirënjohja e popullit të Kosovës është aty dhe do jetë gjithmonë. Nuk ka qenë zgjedhje e duhur për ta shtyrë Kosovën në këtë drejtim. Në Amerikë thuhet se është më lehtë t’ia dredhosh dorën një shoku”, ka thënë Presidentja në prill.
(Kosova Sot Online)
