Borrell: Rruga e vetme drejt normalizimit Kosovë - Serbi zbatimi i plotë i marrëveshjes
Përfaqësuesi për Politikë të Jashtme i Bashkimit Evropian, Josep Borrell, tha sot se rruga e vetme e Kosovës dhe Serbisë në BE është përmes zbatimit të marrëveshjes për normalizim, transmeton gazeta “Kosova Sot Online”.
Këto komente, Borrell i dha gjatë deklarimit të tij për media pas takimit të ministrave të jashtëm të Bashkimit Evropian, pjesë e të cilit ishte edhe kryediplomatja Donika Gërvalla.
Ai bëri thirrje që atmosfera negative, provokimet dhe tensionet e ndërsjella mes Prishtinës dhe Beogradit të marrin fund.
“Bashkimi Evropian është për bashkëpunim, është për fqinjësi dhe për të jetuar së bashku. Për këtë zbatimi i shpejtë dhe i plotë i marrëveshjes mes Beogradit dhe Prishtinës është rruga e vetme drejt normalizimit”, tha Borrell.
“Tensionet dhe provokimet e ndërsjella duhet të mbarojnë. Atmosfera negative e mungesa e konstruktivitetit duhet të përmbyset. Të jesh anëtar i BE-së nënkupton të jesh në gjendje të bashkëpunosh, të veprosh si fqinj i mirë dhe të tejkalosh gjitha vështirësitë e kaluara”, shtoi ai.
Ndër të tjera, Borrell bëri të ditur që në takimin e sotëm u fol për shtetet që kanë refuzuar t’i vënë sanksione Rusisë për pushtimin e Ukrainës.
Në këtë mes, ai ka përmendur Serbinë si një prej këtyre shteteve, ku tha se lidhja e tyre me Rusinë nuk është në përputhje me aspiratat e tyre për anëtarësim në Bashkimin Evropian.
(Kosova Sot Online)