Kurti kërkon që të largohen elementët kriminalë në Veri

Kryeministri i Kosovës, Albin Kurti, sot ka pritur në takim ambasadorin e Francës në Kosovës, Olivier Guerot dhe zëvendësambasadorin gjerman në Kosovë, Matthias Conrad, përcjell “Kosova Sot Online”.

Në këtë takim është diskutuar për zhvillimet në veri të vendit.

Në njoftim thuhet se u pajtuan për rëndësinë jetike të de-eskalimit të situatës.

Në njoftim thuhet se është e domosdoshme vendosja e plotë e sundimit të ligjit në katër komunat në veri të Kosovës për largimin e elementeve kriminale dhe për zgjedhje të reja dhe demokratike.

Njoftimi i plotë:

Kryeministri Kurti takoi ambasadorin e Francës, Guerot dhe zëvendësambasadorin e Gjermanisë, Conrad

Prishtinë, 5 qershor 2023

Kryeministri i Republikës së Kosovës, Albin Kurti, priti në takim sot në mëngjes Ambasadorin e Francës në Kosovë, Olivier Guerot dhe zëvendësambasadorin gjerman në Kosovë, Matthias Conrad.

Në këtë takim u diskutua për zhvillimet e fundit në tre komunat në veri të vendit pas ditës së parë të punës së kryetarëve të rinj dhe dhuna e shkaktuar ndaj ushtarëve të KFOR-it, policëve të Kosovës dhe gazetarëve nga grupe ekstremiste serbe.

U pajtuan për rëndësinë jetike të de-eskalimit të situatës. Kryeministri i njoftoi për profesionalizmin e lartë dhe integritetin e padiskutueshëm të Policisë së Kosovës në menaxhimin e situatës pa asnjë gabim apo defekt.

Vendosja e plotë e sundimit të ligjit në katër komunat në veri të Kosovës është e domosdoshme si për largimin e elementeve kriminale ashtu edhe për një fushatë të hapur dhe fer para zgjedhjeve të lira e demokratike në të ardhmen. U theksua gjithashtu nevoja për zbatimin e plotë, të shpejtë dhe pa kushte të Marrëveshjes Bazike të 27 shkurtit dhe Aneksit të saj.

Kryeministri Kurti falënderoi ambasadorin dhe zëvendësambasadorin për interesimin e vazhdueshëm të Francës dhe Gjermanisë si dhe kontributin e tyre.

(Kosova Sot Online)