Osmani mirëpret në takim ambasadorin italian, i kërkon bashkëpunim për situatën në veri

Që të dënohen grupet kriminale të mbështetura nga Serbia që e kanë sulmuar Policinë, KFOR’in, EULEX’in dhe gazetarët, ka kërkuar presidentja e Republikës së Kosovës Vjosa Osmani gjatë takimit me ambasadorin italian, Antonello De Riu, transmeton gazeta “Kosova Sot Online”.

Ajo po ashtu ka kërkuar bashkëpunim më intensiv për situatën në Veri duke thënë se qytetarët po e vuajnë më së shumti.

Komunikata e plotë nga Presidenca:

Presidentja e Republikës së Kosovës, Vjosa Osmani priti sot në takim ambasadorin italian në Kosovë, Antonello De Riu.

Në takim u diskutua për zhvillimet e fundit në vend. Në emër të qytetarëve të Kosovës, Presidentja Osmani shprehu mirënjohjen e thellë për shërbimin, si dhe profesionalizmin e dëshmuar të trupave italiane të KFOR-it në ballafaqim me zhvillimet e fundit në fushën e sigurisë në veri të vendit dhe u dëshiroi shërim të shpejtë ushtarëve të lënduar.

Me këtë rast, Presidentja Osmani potencoi se ballafaqimi me drejtësinë i grupeve kriminale të mbështetura nga Serbia që sulmuan Policinë e Kosovës, pjesëtarët e KFOR-it dhe EULEX-it, gazetarët dhe qytetarët duhet të jetë përgjigja e vetme dhe se këto sulme duhet të dënohen nga të gjithë.

Ajo theksoi se qytetarët në veri po dëmtohen më së shumti nga kjo situatë, andaj kërkoi për bashkëpunim më intensiv në drejtim të garantimit të një ambienti më të sigurt për qytetarët dhe për lirinë e shprehjes.

Ajo ka vlerësuar lartë bashkëpunimin me Italinë, me ç’rast ka konfirmuar partneritetin e palëkundur dhe gatishmërinë për vazhdim të ngushtë të koordinimit me qëllim të garantimit dhe ruajtjes së paqes, sigurisë dhe stabilitetit afatgjatë në vend e rajon.

(Kosova Sot Online)