Sveçla për kidnapimin e policëve: Është bërë në shenjë hakmarrje për arrestimin e kriminelit Llune
Ministri i Punëve të Brendshme, Xhelal Sveçla, ka bërë thirrje urgjente për lirimin e tre zyrtarëve policorë që u kidnapuan dje brenda Kosovës, përcjell “Kosova Sot Online”.
“Kidnapimi është zhvilluar sipas një plani të planifikuar nga njësiti special antiterror dhe njësiti special i ushtrisë së Serbisë, Kobra në zonën kufitare Bare/Tresav në komunën e Leposaviqit”, tha ai.
“Është e qartë se ky akt kriminal është bërë në shenjë hakmarrje për arrestimin e kriminelit Llune.”
Sveçla tha se Kosova në javët e fundit është përballur me tentativa për destabilizim, e përshkallëzim të situatës në veri.
“Javëve të fundit Kosova është përballur me tentativa për destabilizim të vendit, e përshkallëzim të situatës në veri. Këto tentativa urdhëresat i kanë në Beograd, te fqinji ynë armiqësor ndaj nesh që qasjen e tillë e përsërit në mënyrë konstante”.
(Kosova Sot Online)