Rama: Kjo do të jetë java e rikthimit të akullit, nëse nuk lirohen policët e pafajshëm

Kryeministri i Shqipërisë, Edi Rama, ka bërë sërish thirrje për lirimin e tre policëve të rrëmbyer në veri nga forcat serbe, përcjell “Kosova Sot Online”.

Tutje, Rama ka shkruar se policët edhe nëse e kanë shkelur vijën kufitare, Rama thotë së ata nuk kanë kryer asnjë krim.

Rama ka theksuar se “Kjo do jetë java e rikthimit të akullit mes nesh nëse ata nuk lirohen!”.

“Sa më shumë mbahen në Serbi këta tre burra që edhe sikur ta kenë shkelur vijën e kufirit s’kanë kryer asnjë krim, aq më pak do jetë e mundur që marrëdhëniet tona bilaterale të mos bëjnë shumë hapa mbrapa! Kjo do jetë java e rikthimit të akullit mes nesh nëse ata nuk lirohen!

Nga ana tjetër nëse de-eskalimi nuk ndodh e humbura e madhe do të jetë Kosova – sepse Serbia mbase nuk jeton dot pa u ri-izoluar! Druaj shumë se sa më shumë Albini këmbëngul në të tijën kundër aleatëve, aq më shumë situata mund të agravohet, duke rikthyer KFORin në krye të punës!

E atëherë lamtumirë për kushedi sa kohë edhe kontrollit formal të shtetit mbi krejt territorin dhe ta gëzojmë një Republikë të KFORit në Veriun e Kosovës! Albin dil nga guacka e vetizolimit dhe mos e humb Veriun duke parë kudo armiq e tradhëtarë! Koha është tani dhe po fluturon!“, ka shkruar Rama.

(Kosova Sot Online)