Konjufca thotë se Draft-statuti i Ramës për Asociacionin përmban autonomi territoriale për serbët e Kosovës
Kryeparlamentari i Kuvendit, Glauk Konjufca, ka thënë pas takimit me kryeministrin e Shqipërisë, Edi Rama, se Draft-statuti i Ramës për Asociacionin përmban elemente që çojnë në autonomi për serbët.
Por Konjufca thotë se Rama pretendon se ai draft-staus është në përputhje me Kushtetutën e Kosovës.
“Ai pretendon që është në përputhje me Kushtetutën e Kosovës, por mua më janë dukur se elemente të caktuara të propozuara nga Rama përmbajnë autonomi territoriale për serbët e Kosovës dhe kjo është në kundërshtim të interesit të kombit shqiptar”, ka deklaruar kreu i Kuvendit.
Konjufca ka theksuar se mendon që e ka dëmtuar Kosovën edhe ideja e “Ballkanit të Hapur”
“Ne patëm një krizë në vitin 2017 kur u duk se për Kosovën edhe Shqipëria po është në anën e opsionit që ishte shkëmbimi territorial. Dhe mendoj që kjo e ka dëmtuar Kosovën. Mendoj që e ka dëmtuar Kosovën edhe ideja e “Ballkanit të Hapur” sepse ky është dallim prej asaj se cka ka nevojë Kosova”.
(Kosova Sot Online)
