Ashensori zë poshtë kamarierin 17-vjeçar në Sarandë, vdes në vend

Një 17-vjeçar ka humbur jetën tragjikisht mbrëmjen e djeshme, teksa ka qenë duke punuar në një lokal në Sarandë, përcjell “Kosova Sot Online”

Adoleshenti punonte si ndihmës kamerier është zënë poshtë nga ashensori i lokalit, ku edhe ka vdekur.

Ndërkohë në lidhje me ngjarjen është arrestuar qytetari me iniciale L.A 43 vjeç për veprën penale ”Shkelja e rregullave të mbrojtjes në punë”, dhe është shpallur në kërkim shtetasi S.I., 37 vjeç, pronari i lokalit.

Njoftimi i policisë

Specialistët për Hetimin e Krimeve në Komisariatin e Policisë Sarandë arrestuan në flagrancë për veprën penale ”Shkelja e rregullave të mbrojtjes në punë”, shtetasin L.A., 43 vjeç, banues në Sarandë si dhe shpallën në kërkim shtetasin S.I., 37 vjeç, banues në Sarandë.

Arrestimi i 43-vjeçarit dhe shpallja në kërkim e 37-vjeçarit u bë pasi:

Rreth orës 01:15 minuta të mëngjesit të sotëm, në lagjen “Nr. 1″, Sarandë, në lokalin në pronësi të shtetasit S. I., është këputur kavoja e ashensorit që përdorej kryesisht për furnizimin e lokalit, duke zënë poshtë shtetasin A. D., 17 vjeç, (ndihmës/kamarier në këtë lokal). Për pasojë, 17-vjeçari ka humbur jetën.

Nga veprimet hetimore të kryera ka rezultuar se 43-vjeçari i arrestuar kishte montuar ashensorin e lokalit ndërsa 37-vjeçari i shpallur në kërkim është pronari i lokalit dhe vijon puna intensive për kapjen e tij.

Materialet i kaluan Prokurorisë për veprime të mëtejshme për veprën penale “Shkelja e rregullave të mbrojtjes në punë” .

(Kosova Sot Online)