SHBA reagon pasi kompanitë planifikojnë misione të reja në Titanik

Qeveria amerikane po përpiqet të ndalojë një mision të planifikuar për të rikuperuar objekte me interes historik nga Titaniku i fundosur. Sipas ligjit federal dhe një marrëveshje ndërkombëtare rrënojat konsiderohen si “varr i shenjtë”, transmeton gazeta “Kosova Sot Online”

Ekspedita organizohet nga RMS Titanic me bazë në Xheorxhi, e cila zotëron të drejtat e kërkimit për anijen më të famshme në botë. Sipas Associated Press, kompania po ekspozon sende të gjetura nga vendi i mbytjes në fund të Atlantikut të Veriut – nga argjendi deri te një pjesë e bykut të Titanikut.

Sfida e qeverisë vjen më shumë se dy muaj pasi nëndetësja Titan u shkatërrua pranë anijes oqeanike të fundosur, duke vrarë pesë njerëz. Por kjo mosmarrëveshje ligjore nuk ka të bëjë fare me tragjedinë e qershorit, e cila përfshiu një kompani tjetër dhe një anije të projektuar në mënyrë jokonvencionale.

Mosmarrëveshja ligjore po zhvillohet në Gjykatën e Qarkut të SHBA në Norfolk, Virxhinia, e cila mbikëqyr çështjet e shpëtimit të Titanikut. SHBA pretendon se misioni shkel një ligj federal dhe një marrëveshje me Britaninë e Madhe për të menaxhuar rrënojat si një përkujtim për njerëzit që vdiqën. Kujtojmë se anija goditi një ajsberg dhe u mbyt në vitin 1912. Ndër shqetësimet e qeverisë amerikane janë objektet dhe çdo mbetje njerëzore që mund të jetë e pranishme.

Çfarë përgjigjet kompania?

Misioni RMST është planifikuar për në maj 2024, sipas një raporti që kompania paraqiti në gjykatë në qershor. Kompania tha se planifikon të marrë imazhe të të gjithë rrënojave. Kjo përfshin “brendësinë e rrënojave, ku përkeqësimi ka hapur boshllëqe që mund të lejojnë një mjet të telekomanduar të depërtojë në byk pa ndikuar në strukturën aktuale”.

RMST gjithashtu deklaroi se “mund të rikuperojë objekte nga brenda rrënojave”.

Për momentin, kompania nuk planifikon të hapë rrënojat apo të shkëputë ndonjë pjesë të saj. Kompania tha gjithashtu se do të bashkëpunojë me Administratën Kombëtare të Oqeanit dhe Atmosferës (NOAA), e cila përfaqëson interesin publik për mbytjen. Megjithatë, RMST ka thënë se nuk ka ndërmend të kërkojë leje. Avokatët e qeverisë amerikane kanë thënë se kompania nuk mund të vazhdojë pa lejen, duke argumentuar se RMST ka nevojë për miratim nga Sekretari i Tregtisë i SHBA, i cili mbikëqyr NOAA.

(Kosova Sot Online)