Rama pas intervistës së Thaçit: Gjykimi në Hagë ngre pikëpyetje mbi nivelin e respektimit të parimit themelor demokratik
Pas intervistës së ish presidentit të Kosovës, Hashim Thaçi nga Haga, ka reaguar kryeministri i Shqipërisë, Edi Rama, përcjell “Kosova Sot Online”.
Rama Thaçin e ka quajtur mik dhe vëlla.
Rama ka shpërndarë videon e intervistës dhe ka shkruar se ndaj Thaçit po zhvillohet një gjykim që sa më shumë vazhdon, aq më shumë ngre pikëpyetje mbi nivelin e respektimit të parimit themelor demokratik të “procesit të drejtë”.
“Dhe me këtë intervistë të Presidentit të Republikës së Kosovës e komandantit të Ushtrisë Çlirimtare të Kosovës, mikut tonë e vëllait tim Hashim Thaçi, i cili ka folur për herë të parë qysh nga dita e kyçjes në burgun e Hagës, ku po zhvillohet një gjykim që sa më shumë vazhdon, aq më shumë ngre pikëpyetje mbi nivelin e respektimit të parimit themelor demokratik të “procesit të drejtë”, ju uroj një ditë të mbarë të gjithëve ju, në Shqipëri e në Kosovë”, ka shkruar Rama.
Thaçi në intervistën e tij nga Haga ka folur edhe për kryeministrin shqiptar, Edi Rama. I pyetur për marrëdhëniet e tij me kreun e qeverisë shqiptare, ndër të tjera, Thaçi ka rrëfyer edhe vizitën e Ramës tek ai në Hagë.
(Kosova Sot Online)