Gërvalla: Kosova fiton të drejtën të jetë nikoqire e 'Lojërave Mesdhetare 2030'

Pas vendimit që Lojërat Mesdhetare të mbahen në Prishtinë, ka reaguar ministrja e Punëve të Jashtme, Donika Gërvalla, transmeton gazeta “Kosova Sot Online”.

Ajo ka thënë se përgatitjet për Lojërat Mesdhetare 2030 do të shënojnë njëkohësisht hovin më të madh të ndërtimit të infrastrukturës sportive dhe turistike të të gjitha kohërave në Kosovë.

Tutje ajo ka uruar të gjithë ata që kanë kontribuar për deri në arritjen e këtij vendimi.

“Me 55 vota për dhe 8 vota kundër, Kosova fiton të drejtën të jetë nikoqire e Lojërave Mesdhetare 2030.

Këtë sukses historik dëshiroj t’ia dedikoj të gjithë atyre sportisteve e sportistëve, të paraluftës e të pasluftës, të cilët edhe pse shpesh pa kushte elementare, asnjëherë nuk e braktisën ëndrrën dhe pasionin e tyre dhe na bënë krenarë me sukseset e tyre.

Përgatitjet për Lojërat Mesdhetare 2030 do të shënojnë njëkohësisht hovin më të madh të ndërtimit të infrastrukturës sportive dhe turistike të të gjitha kohërave në Kosovë.

Urime të gjithëve dhe faleminderit shumë të gjithë atyre që kontribuan në arritjen e këtij suksesi historik”, ka shkruar ajo në një postim në “Facebook”.

(Kosova Sot Online)