KE propozon zgjatjen e mbrojtjes së përkohshme për njerëzit që largohen nga Ukraina

Komisioni Evropian propozoi të martën një zgjatje shtesë të mbrojtjes së përkohshme për njerëzit që ikin nga Ukraina. Zgjatja e propozuar nga 4 mars 2024 në 3 mars 2025 “do të ofrojë siguri dhe mbështetje për më shumë se 4 milionë persona që gëzojnë mbrojtje në të gjithë BE”, tha komisioni, transmeton gazeta “Kosova Sot Online”.

BE-ja aktivizoi një Direktivë për Mbrojtjen e Përkohshme në Mars 2022 dhe shtetet anëtare ranë dakord unanimisht për ta zgjatur atë automatikisht me një vit.

“Komisioni konsideron se arsyet për mbrojtjen e përkohshme vazhdojnë dhe se mbrojtja e përkohshme duhet të zgjatet si një përgjigje e nevojshme dhe e përshtatshme ndaj situatës aktuale, të paqëndrueshme, e cila nuk është ende e favorshme për kthimin e sigurt dhe të qëndrueshëm të atyre që gëzojnë mbrojtje të përkohshme në BE”, thuhet në deklaratë.

Që nga aktivizimi i mbrojtjes së përkohshme, që ndodhi vetëm një javë pasi Rusia nisi pushtimin e saj të plotë të Ukrainës, vendet anëtare “treguan solidaritet të paparë me popullin ukrainas, jo vetëm duke i mirëpritur ata në vendet e tyre, por edhe duke bërë përpjekje konkrete për të lehtësuar përfshirjen e tyre në shoqëri”, tha komisioni.

Propozimi i komisionit tani do të duhet të miratohet nga Këshilli Evropian.

E ashtuquajtura Platforma e Solidaritetit me Ukrainën, e cila u krijua nga komisioni në fillim të luftës, ndihmon në koordinimin e çështjeve operacionale dhe mbështetjen në terren ndërmjet institucioneve të BE-së, vendeve anëtare dhe vendeve të lidhura me Shengenin, si dhe organizatave ndërkombëtare dhe autoritetet ukrainase.

(Kosova Sot Online)