Blinken thirrje Kosovës dhe Serbisë: Përmbahuni nga veprimet që nxisin tensione

Sekretari amerikan i Shtetit, Antony Blinken, ka thënë se SHBA dënojnë ashpër sulmet e koordinuara të dhunshme ndaj Policisë së Kosovës pranë Manastirit të Banjskës, përcjell “Kosova Sot Online”.

Tutje, Blinken ka thënë se ju bën thirrje qeverive të Kosovës dhe Serbisë që të përmbahen nga çdo veprim apo retorikë që mund të nxisë tensionet

Blinken ka thënë se do të vazhdojnë të monitorojnë situatën dhe të koordinohen me të gjithë të përfshirët.

“Shtetet e Bashkuara të Amerikës dënojnë ashpër sulmet e koordinuara të dhunshme ndaj Policisë së Kosovës pranë Manastirit të Banjskës më 24 shtator dhe shprehin ngushëllime të thella për familjen e rreshterit të Policisë së Kosovës të vrarë në krye të detyrës. Autorët e këtij krimi duhet të mbajnë përgjegjësi nëpërmjet një procesi hetimor transparent. Ne i bëjmë thirrje qeverive të Kosovës dhe Serbisë që të përmbahen nga çdo veprim apo retorikë që mund të nxisë tensionet dhe të punojnë menjëherë në koordinim me partnerët ndërkombëtarë për të de-përshkallëzuar situatën, për të garantuar sigurinë dhe sundimin e ligjit dhe për t’u kthyer dialogun e lehtësuar nga BE’ja”, ka thënë Blinken.

(Kosova Sot Online)