Mustafa: Qeveria i ka harruar familjet e dëmtuara nga vërshimet

Deputeti i LDK-së, Besian Mustafa, ka thënë se ka kaluar gati një vit nga vërshimet në Skenderaj, Mitrovicë, Podujevë, Istog, Drenas e Vushtrri, ndërsa qeveria është zhdukur, përkundër premtimeve se do t’i ndihmonte familjet e dëmtuara, transmeton gazeta “Kosova Sot Online”.

Mustafa tha se raportet e komunave tregojnë se vërshimet shkaktuan dëme prej dhjetëra miliona eurove në shtëpi, pajisje e bujqësi, ndërsa qeveria ndau vetëm një milion euro dhe i harroi familjet e dëmtuara.

“Për, këto familje nuk kanë harruar. Ato çdo ditë përballen me shtëpitë e tyre të dëmtuara, me pajisjet e tyre të dëmtuara, me kulturat e tyre bujqësore të dëmtuara, me bagëtinë e tyre që s’e kanë më”.

“Për qeverinë, këto dëme mund të jenë të parëndësishme por për këto familje jeta është bërë gati e papërballueshme e dimri që po vije po i gjen ato në gjendje të mjerueshme”, tha Mustafa.

Tutje, ai tha se qeveria bënë mirë t’i kthejë sytë nga familjet e dëmtuara e t’ua kompensojë dëmet nga vërshimet, e të mos i braktisë edhe këtë dimër.

(Kosova Sot Online)