Zbardhen detaje: Punëtorët shqiptarë që vdiqën në Gjermani po punonin në të 'zezën'

Raportohet se 31-vjeçari me iniciale A.Z. nga Elbasani është njëri prej viktimave që humbi jetën tragjikisht në kantierin e ndërtimit në Hamburg mëngjesin e të hënës, transmeton gazeta “Kosova Sot Online”.

Vëllai i të ndjerit ndodhet i burgosur në Angli, ndërsa i ati i moshuar ka mbërritur në Hamburg, 

Viktima e dytë e identifikuar është një i ri nga Kukësi me inicialet R.H.

Shqiptarët, punonjës në të zezë në kantier janë paraqitur me dokumente të rreme bullgare dhe kjo është arsyeja e paqartësisë së identiteteve të tyre nga shteti gjerman.

Besohet se numri i shqiptarëve që kanë humbur jetën në skelën që u shemb është pesë, tre shqiptarë të Shqipërisë dhe dy shqiptarë të Maqedonisë së Veriut të gjithë të regjistruar me dokumenta bullgare. Mbrëmjen e djeshme është nxjerrë nga rrënojat një tjetër trup.

Administratori shqiptar nga Kosova i firmës që kishte regjistruar shqiptarët me dokumente false është zhdukur.

Ngjarja ndodhi teksa shqiptarët po punonin për ndërtimin e një pallati në zonën e HafenCity.

Mendohet se ka ende viktima nën rrënoja dhe po punohet për nxjerrjen e trupave.

(Kosova Sot Online)