Komuna del me njoftim pasi erërat e forta shkaktojnë dëme në Prishtinë
Erërat e forta të së dielës kanë shkaktuar dëme në kryeqytet, ka bërë të ditur Drejtoria për Siguri dhe Emergjenca në Komunën e Prishtinës, transmeton gazeta "Kosova Sot Online".
Sipas një njoftimi nga kjo drejtori, dëmet janë vërejtur nëpër ndërtesa dhe rrugë të kryeqytetit.
Për sanimin e tyre, kanë dalë ekipet emergjente.
“Si pasojë e erërave të forta janë shkatuar dëme të vogla në disa ndërtesa dhe rrugë të #kryeqytetit. Ekipet tona kanë dalë në terren për të bërë sanimin e këtyre dëmeve dhe janë në gatishmëri për çdo emergjencë tjetër”, thuhet në njoftim.
Komuna bën ftesë për kujdes të shtuar dhe shmangien e lëvizjeve të panevojshme. Për çdo rast, lajmëroni Qendrën Operative Emergjente të Kryeqytetit në numrat: 0800 122 33 ose 0800 122 44.
(Kosova Sot Online)
