Ja kujt ia kërkon Konjufca përkrahjen e mëtejshme për proceset integruese të Kosovës

Ambasadorin e Hungarisë në Kosovë, Béla Bozsik,e priti sot në takim kryetari i Kuvendit, Glauk Konjufca, transmeton gazeta “Kosova Sot Online”.

Siç thuhet në njoftimin nga Kuvendi, në këtë takim u diskutua lidhur me marrëdhëniet e mira që ekzistojnë midis dy vendeve dhe për impaktin pozitiv që ato kanë në procesin e integrimit europian të Kosovës e të forcimit të subjektivitetit ndërkombëtar të saj.

Konjufca falënderoi ambasadorin Bozsik për mbështetjen e qeverisë hungareze për Kosovën dhe theksoi nevojën që kjo përkrahje të vazhdojë në proceset që vendi ynë ka para vetes.

Ambasadori hungarez Béla Bozsik pasi falënderoi kryetarin Konjufca për pritjen e përzemërt, konfirmoi angazhimin e vazhdueshëm të shtetit të tij në mbështetje të aspiratave euroatlantike të Kosovës dhe forcimit të rolit të saj në marrëdhëniet ndërkombëtare.

Bashkëbiseduesit ndanë mendimin e përbashkët mbi domosdoshmërinë e forcimit të bashkëpunimit në fusha të interesit të dyanshëm.

(Kosova Sot Online)