Sveçla pritet nga homologu turk Ali Yerlikaya

Gjatë vizitës së tij në Turqi, ministri i Punëve të Brendshme, Xhelal Sveçla, ka takuar homologun Ali Yerlikaya, 
transmeton gazeta “Kosova Sot Online”.

Sveçla e Yerlikaya folën për sfidat aktuale dhe mundësitë e reja për thellimin e bashkëpunimit, me theks në fushën e sigurisë dhe teknologjisë në të cilat, sipas Sveçlës, Turqia ka shënuar arritje mbresëlënëse.

“Republika e Kosovës, që nga shpallja e pavarësisë e përgjatë gjithë procesit të shtetndërtimit ka gëzuar përkrahjen e Republikës së Turqisë e veçanërisht në fushën e sigurisë përmes ngritjes së  kapaciteteve njerëzore dhe atyre teknike”.

“Në frymën e gatishmërisë për të shkëmbyer përvojat më të mira dhe arritjet në fushat që Ministritë tona mbulojnë, me mirënjohjen për mbështetjen nga shteti turk, shpreha interesin që ky bashkëpunim të shtrihet edhe në ekspertizat specifike që do të kontribuojnë në sigurinë e përgjithshme në Republikën e Kosovës”, shkroi Sveçla.

Ndërsa, për takimin shkroi edhe ministri turk, i cili tha se me Sveçlën folën për luftën kundër organizatave terroriste.

“Me z. Sveçla vlerësuam bashkëpunimin ndërmjet ministrive tona në fushën e sigurisë, veçanërisht në luftën kundër organizatave terroriste dhe grupeve të krimit të organizuar”, tha ai.

(Kosova Sot Online)