Zbulohen detaje nga aksidenti fatal që ua mori jetën tre të rinjëve: Dy shoferët u morën vesh që të garonin

Dy të arrestuarve për aksidentin që të shtunën pak para mesnatës ua mori jetën tre të rinjve në kilometrin e 15-të të autostradës “Ibrahim Rugova”, Gjykata Themelore e Prizrenit ka vendosur t’ua caktojë nga një muaj paraburgim, transmeton gazeta “Kosova Sot Online”.

Gjykata njofton se ka “dyshim të bazuar” se ata organizuan “garë të kundërligjshme automobilistike”, duke u marrë vesh paraprakisht.

A.S. dhe I.H.,sipas Gjykatës, ishim marrë vesh paraprakisht për garën e cila ua mori jetën tre të rinjve që po e ndiqnin atë.

“Me datë 16 dhjetor 2023, rreth orës 22:30, në autostradën ‘’Ibrahim Rugova’’ në Prizren, saktësisht me dashje dhe në bashkëkryerje, veprojnë në kundërshtim me Rregullat e Trafikut Rrugor, në atë mënyrë që paraprakisht, merren vesh dhe organizojnë garë të kundërligjshme automobilistike, ashtu që të pandehurit, A.S., dhe I.H., lëvizin paralelisht me automjetet e tyre me një shpejtësi jashtëzakonisht të madhe, dhe në një moment i pandehuri i dytë me automjetin e tij i afrohet të pandehurit të parë, me ç’rast i pandehuri A.S., humb kontrollin mbi drejtimin e automjetit duke devijuar në mënyrë diagonale nga shiriti i majtë i rrugës, me ç’rast e godet automjetin  tjetër i cili ishte i ndalur në shiritin emergjent të austostradës dhe për pasojë godet për vdekje këmbësorët – viktimat N.B., M.D., dhe L.S, të cilët ishin duke e ndjekur zhvillimin e garës dhe në të njëjtën kohë u shkakton lëndime trupore të dëmtuarve M.Z., S.Z., dhe B.P., të cilët gjithashtu ishin në vendin kritik duke e ndjekur zhvillimin e garës automobilisitke në mes të të pandehurve“, thuhet në njoftimin e Gjykatës.

Dy të pandehurit akuzohen për veprën penale të “rrezikimit të trafikut publik”.

“Kurse a do të argumentohen këto fakte do të vlerësohet në fazat e mëtejme të procedurës penale”, thotë Gjykata.

Me rastin e caktimit të paraburgimit, Gjykata thotë se ka marrë parasysh “faktin se rasti është në fazën fillestare të hetimeve, dhe do të merret në pyetje të pandehurit, dhe dëshmitarët eventual”.

“Andaj me lënien në liri të të pandehurve ekziston i posaçëm se të njëjtit do të pengojnë rrjedhën e procedurë hetimore, duke tentuar të ndikojnë  në dëshmitarë apo tek bashkë të pandehurit”, thuhet në njoftimin e Gjykatës.

Por, duke marrë parasysh “peshën e rëndë të veprës penale që i’u, ngarkohet dhe pasojat që kanë shkaktuar me veprimet e tyre”, Gjykata konstatoi se caktimi i paraburgimit është “i arsyeshëm dhe i domosdoshëm”.

“Gjykata ka konstatuar se caktimi i masës së paraburgimit në këtë fazë është i domosdoshëm, duke marrë parasysh peshën e rëndë të veprave penale për të cilat dyshohen të pandehurit, dhe rrethanat në të cilat dyshohet se janë kryer veprat penale, duke ndërmarrë veprime të rrezikshme, të gjitha këto shtojnë dyshimin se me lënien e të të pandehurve në liri të njëjtit mund të përsëris veprën penale, apo mund të ipen në arrati me qëllim të shmangies nga përgjegjësia penale”, thuhet në njoftimin e Gjykatës Themelore të Prizrenit.

(Kosova Sot Online)