Erdogan e krahason Netanyahun me Hitlerin

Recep Tayyip Erdoğan e ka krahasuar Benjamin Netanyahun me Adolf Hitlerin në një fjalim që ka gjasa të shkaktojë një reagim të fortë në Izrael, transmeton gazeta “Kosova Sot Online”.

Presidenti turk ka qenë një kritik i hapur i veprimeve të Izraelit që nga 7 tetori dhe ka veçuar vazhdimisht kryeministrin izraelit.

Associated Press raporton se në një ceremoni çmimesh në Ankara, Erdogan iu referua një videoje të transmetuar në televizionin turk që dukej se tregonte ushtarët izraelitë që grumbullonin burra gjysmë të zhveshur në një stadium në Gaza, duke thënë:

“Ne pamë kampet naziste të Izraelit në stadiume, apo jo? Çfarë është kjo? E mbani mend që ata flisnin për Hitlerin në një mënyrë të çuditshme? Si je ndryshe nga Hitleri?”, tha Erdogan.

 “Ata do të na bëjnë të dëshirojmë Hitlerin. A ka ndonjë gjë ndryshe në veprimet e Netanyahut në krahasim me veprimet e Hitlerit?”

Erdogan vazhdoi duke thënë se Netanyahu po merrte “të gjitha llojet e mbështetjes” nga SHBA, duke shtuar “Dhe me gjithë këtë mbështetje, çfarë u bënë ata më shumë se 20,000 banorëve të Gazës? Ata i vranë”.

Erdogan i është referuar më parë Netanyahut si “kasapi i Gazës”, e akuzoi atë për veprime që përbëjnë “gjenocid” dhe bëri thirrje që ai të ndiqet penalisht nga një gjykatë ndërkombëtare për krimet e luftës, raporton The Guardian.

(Kosova Sot Online)