A do ta marrin shqiptarët në dorë qeverinë në Maqedoninë e Veriut?
Nga janari 2024, Maqedonia e Veriut do të ketë dhe një kryeministër shqiptar, çka tregon për ndryshimin rrënjësor të vendit që shume kohë më parë ishte përfshirë nga luftëra ndëretnike, transmeton gazeta "Kosova Sot Online".
Marrëveshja e koalicionit qeveritar mes BDI dhe LSDM përcaktonte që në krye të qeverisë teknike para zgjedhjeve të ishte një kryeministër shqiptar nga radhët e BDI, e cila zgjodhi Talat Xhaferrin për këtë pozicion.
Agim Nuhiu, ish-ministri i parë i brendshëm shqiptar në RMV nga BDI tha në një intervistë për Euronews Albania se BDI ka kuadër të përgatitur për të dhënë kontributin e tyre në qeverisje, një nga të cilët është Talat Xhaferri. Ky i fundit sipas tij, është krenari për BDI në luftën për barazi dhe mosdiskriminim ndaj shqiptarëve në RMV.
“Talat Xhaferri është edhe amanet i BDI se mbart krenarinë e lavdishme të luftë për barazi dhe mosdiskriminim por është edhe njeriu që ka ngritur performancën e parlamentit të RMV në të tri funksionet themeltare. Një njeri që di të japë kontribute për të forcuar performancën shtetërore të RMV do të dijë të udhëheqë edhe qeverinë”, tha Nuhiu.
(Kosova Sot Online)
