Borrell: BE nuk e ka pezulluar financimin ndaj agjencisë UNRWA

“Angazhimet e vazhdueshme të financimit nga BE janë respektuar dhe financimi nuk është pezulluar.” Kështu shkruan në një shënim zyra e kreut të politikës së jashtme të Bashkimit Evropian, Josep Borrell, transmeton gazeta “Kosova Sot Online”.

“Roli i UNRWA-s është jetik në rrethanat aktuale në Gaza”, thuhet në deklaratë. “2 milionë njerëz kanë nevojë të dëshpëruar për ndihmën e ofruar nga UNRWA dhe agjenci të tjera të OKB-së.”

Borrell përshëndeti masat e shpejta dhe vendimtare të marra nga organizata në dritën e akuzave shumë serioze kundër një numri të stafit të UNRWA dhe tha se “BE do të përcaktojë vendimet e ardhshme për financimin në dritën e rezultatit të hetimeve”.

Bashkimi Evropian është një nga donatorët më të mëdhenj të UNRWA, duke siguruar rreth një të dhjetën e financimit të agjencisë së OKB-së sipas të dhënave të vitit 2022.

(Kosova Sot Online)