Rama e bën 'Drejtor të Shërbimeve Publike' ish-zyrtarin e Nismës
Kryetari i kryeqytetit Përparim Rama ka njoftuar Bekim Brestovci është emëruar të hënën drejtor i Shërbimeve Publike në Komunën e Prishtinës, transmeton gazeta "Kosova Sot Online".
Nga kjo pozitë Rama e kishte shkarkuar Ilirik Musliun nga radhët e Partisë Demokratike të Kosovës (PDK), si marrëveshje e koalicionit lokal LDK-PDK. Tashmë në vend të Musliut do të jetë Brestovci.
“Pas lirimit nga detyra të Drejtorit të Shërbimeve Publike, sot, kam emëruar z. Bekim Brestovci, një profesionist me përvojë shumëvjeçare në Gjermani dhe Kosovë, si Drejtor të ri të Shërbimeve Publike. Pres nga ai që të ndërmerr menjëherë, të gjitha masat e nevojshme për t’i dhënë fund problemit të mbeturinave dhe të gjitha çështjeve tjera që ndërlidhen me fushëveprimin e kësaj drejtorie”, ka shkruar Rama në Facebook.
Pas kësaj, ka reaguar vetë Bekim Brestovci i cili ka qenë këshilltar i Ramës, i cili në të kaluarën ka qenë zyrtar i NISMA Socialdemorkate q udhëhiqet nga Fatmir Limaj.
“Me kënaqesinë më të madhe bëj të ditur që tanimë jam pjesë e kabinetit të kryetarit të Prishtinës, Përparim Rama, në funksionin e këshilltarit për investime kapitale, investimet e huaja, zhvillimin e turizmit në zonat rurale si dhe avansimin e sherbimeve publike. I jam mirënjohës kryetarit Rama për besimin e dhënë, për të qenë bashkëpjesmarrës në realizimin e vizionit dhe programit të tij për transformimin e qytetit të Prishtinës. Bashk na priftë e mbara”, ka shkruar në Facebook Brestovci.
Të hënën, Përparim Rama ka shkarkuar nënkryetaren e Prishtinës nga radhët e PDK-së, Donjeta Sahatçiun.
Pas shkarkimit të saj, ka reaguar kolegja e saj në parti, Eliza Hoxha që mban është deputete e PDK-së në Kuvendin e Kosovës.
Hoxha ia ka përmendur Ramës “Badovcin”, pasi një sërë publikimesh në media tregonin për disa shkëmbime pronash.
PDK-ja që është partner koalicioni i LDK-së në nivel lokal nuk ishte pajtuar me një shkëmbim të tillë – gjë që nisi edhe shfaqjen publike të shenjave të çarjeve në mes partive që drejtojnë kryeqytetin.
(Kosova Sot Online)
