Sinani godet Shqiprim Arifin, e quan Rrahman Morina 2.0

Këshilltarja politike e kryeministrit të Kosovës për Preshevë, Medvegjë dhe Bujanoc, Ardita Sinani ka hedhur akuza të rënda për kryetarin e komunës së Preshevës, Shqiprim Arifi, transmeton gazeta “Kosova Sot Online”.

Sinani tha se deklaratat e Arifit kundër kryeministrit Albin Kurti po shfrytëzohen nga mediat e Serbisë.

“Është e turpshme kur lajmet në mediat e Serbisë fillojnë me citatin e Shqiprim Arifit për kryeministrin e Republikës së Kosovës”, tha ajo.

Madje ajo shkoi edhe më tej duke thënë se “është e pafalshme që Serbia ka rigjetur një vegël të ngjashme si Rrahman Morina, që e përdor dhe kontrollon për interesat e veta kundrejt Kosovës”.

“E ky Rrahman Morina 2.0 këto deklarata i bën çdo ditë për të mbuluar dështimin e tij në pushtetin lokal në Preshevë, por edhe për të defokusuar vëmendjen nga problemet reale”, ka shkruar ajo.

Sipas Sinanit komuna e Preshevës është defakto pa udhëheqje dhe se “po vazhdon të zhvatet çdo ditë me projekte ku punëkryes janë oligarkët e afërt me Arifin”.

(Kosova Sot Online)