Besnik Bislimi e kritikon Lajçakun për qasje jo-neutrale në dialogun Kosovë-Serbi
Zëvendëskryeministri, Besnik Bislimi, ka reaguar ndaj emisarit të BE-së për dialogun Kosovë-Serbi, Miroslav Lajçak, ku e ka kritikuar për qasje jo të drejtë dhe jo neutrale sa i përket çështjes së dialogut, përcjell “Kosova Sot Online”.
E gjithë kjo erdhi pas një postimi që bëri të martën Lajçak ku shkroi se kishte një takim me përfaqësues të Konventës Kombëtare për Bashkimin Evropian (NCEU).
Bislimi ka shkruar se Lajçak nuk ka treguar që ishte NCEU e Serbisë.
“Emisari Lajçak ka postuar nga takimi i mbajtur me NCEU (National Convention on European Union in Serbia), disa orë para raportimit në PSC (Political and Security Committee) për dialogun ndërmjet Kosovës dhe Serbisë, por ka vendosur të mos përmend se bëhet fjalë për NCEU në Serbi”, ka shkruar Bislimi.
“Megjithatë, delegacioni përbëhet kryesisht nga OJQ-të serbe nga Kosova, të cilat në mënyrë aktive dhe të hapur avokojnë kundër integrimit të qytetarëve serbë në jetën ekonomike dhe sociale të Kosovës. Z. Lajçak duhet të na shpjegojë nëse në narrativën e tij, OJQ-të serbe nga Kosova janë pjesë e NCEU Serbia dhe nëse NCEU Serbia bie nën ombrellën e tij. Një tjetër demonstrim i fortë i qasjes ‘të drejtë’ dhe ‘neutrale’ të zotit Lajçak ndaj palëve në procesin e normalizimit”, ka shkruar Bislimi.
1/3 EUSR Lajcak posted from a meeting held with NCEU, hours before reporting to PSC on the normalization dialogue between Kosova and Serbia, but decided not to mention that it is about NCEU in Serbia.https://t.co/PArrbcpyQ7
— Besnik Bislimi (@BislimiBesnik) February 14, 2024
(Kosova Sot Online)
