Kurti nga Klinka e Gjinekologjisë: S’do të ketë më dhoma me nga 9 shtretër

Për të parë nga afër renovimet që po bëhen, kryeministri Albin Kurti ka vizituar sot Klinikën e Gjinekologjisë, transmeton gazeta “Kosova Sot Online”,

Kurti tha se u gëzua kur mori vesh që nuk do të ketë më dhoma me nga gjashtë deri në nëntë shtretër, por sipas tij, dhomat do të jenë me maksimalisht dy shtretër.

“Janë lajm i mirë edhe këto 3 shërbime të reja pra, Fertilizimi i Asistuar Mjekësor, si dhe Mjekësia Fetale dhe Amniocenteza të cilat pa dyshim që do ta rrisin edhe reitingun e QKUK-së, në përgjithësi e në veçanti Klinikës Gjinekologjike”, ka thënë Kurti.

“Por, në të njëjtën kohë, paralelisht siç e dimë edhe ne nga politika do të rriten pritjet e pacientëve, pra pacientët kur iu tregoni se jepni më shumë shërbime dhe e keni ngritur cilësinë e shërbimeve, automatikisht ngriten edhe pritjet e tyre, kështu që duhet që bashkërisht atyre pritjeve t’iu dalim zot sa më mbarë e mirë, dhe me lehtësi e me shpejtësi”, është shprehur kryeminsitri.

Më tej, Kurti i falënderoi mjekët për kontributin, përkushtimin, punën e angazhimin, që sipas tij, e bëjnë për ditë e për çdo orë “por mbase për çdo minutë e për çdo sekondë, sepse këtu lind jeta edhe momentet fare të shkurta bëhen vendimtare”.

“Prandaj, jeni heronj të heshtur, të gjallë të punës të cilët kurrë nuk do të mund ta marrin mirënjohjen e merituar publike, por le ta shfrytëzojmë këtë vizitë që t’ua kthejmë një pjesë të vogël të borxhit të pamatshëm që në parim është i pakthyeshëm”, ka thënë Kurti.

(Kosova Sot Online)