'NATO nuk e dëshiron një përballje të drejtpërdrejtë me Rusinë'

Aleanca e Atlantikut të Veriut nuk e dëshiron një përballje të drejtpërdrejtë me Rusinë. Kështu shprehet Gjenerali i NATO-s për Europën, Christopher Cavoli. Shefi i shtabit të NATO-s për Europën, duke folur në Universitetin e Georgetown në Washington, theksoi qartë se NATO jo vetëm që nuk është në luftë me Rusinë por as nuk e dëshiron një gjë të tillë, transmeton gazeta "Kosova Sot Online".

‘Vendet e NATO-s nuk besojnë se ne jemi në luftë me Rusinë. Dhe ne as nuk e duam një gjë të tillë. Sa më shumë bëhen të vrullshme erërat e konfliktit në Evropë, aq më i madh është rreziku i aksidenteve katastrofike. Sepse, në kundërshtim me atë që ndodhi gjatë Luftës së Ftohtë, ushtritë kundërshtare nuk dinë më të komunikojnë’, tha Christopher Cavoli, gjeneral i NATO-s për Europën.

Në të njëjtën kohë, Cavoli e quajti ndihmën ushtarake për Ukrainën një strategji për të frenuar’ agresionin rus’, por jo përfshirjen në një konfrontim të drejtpërdrejtë ushtarak me Federatën Ruse. Gjenerali shtoi se vendet e NATO-s vendosën të mos marrin një pozicion në të cilin anëtarët e aleancës mund të konsiderohen palë në konflikt.

‘Pyes veten se çfarë nënkupton Presidenti i Francës kur bëri thirrje që trupat e NATO-s të dërgohen në Ukrainë për të ndihmuar Forcat e Armatosura të Ukrainës, si dhe disa anëtarë të tjerë të aleancës që nuk e përjashtojnë një skenar të tillë të paktën në të ardhmen e afërt’, tha Cavoli.

Moska ka shprehur vazhdimisht shqetësimin për aktivitetin në rritje të NATO-s pranë kufijve të saj perëndimorë. Vetë aleanca e shpjegon këtë si frenues të ‘agresionit të mundshëm rus’, megjithëse udhëheqja ruse vazhdimisht deklaron se qëllimi i operacionit special në Ukrainë është vetëm të garantojë sigurinë e saj dhe se Rusia nuk ka ndërmend të sulmojë askënd.

(Kosova Sot Online)