Kurti i zbulon faktorët se pse duhet të investohet në Kosovë

Në kuadër të vizitës dhe pjesëmarrjes së bizneseve nga Kosova në panairin Hannover Messe 2024, nën organizimin e Agjencisë për Investime dhe Përkrahjen e Ndërmarrjeve në Kosovë (KIESA), Kryeministri i Kosovës, Albin Kurti bashkë me ministren e Industrisë, Ndërmarrësisë dhe Tregtisë, Rozeta Hajdari morën pjesë në prezantimin dhe diskutimin me biznese (Bussiness to Busisness), transmeton gazeta “Kosova Sot Online”.

Në fjalën e tij para të pranishmëve, kryeministri listoi katër faktorë kryesorë që sipas Kurtit bëjnë Kosovën destinacion të veçantë për investime të huaja nga Gjermania. 

“Të parin e renditi besimin e fortë dhe lidhjet historike ndërmjet Kosovës dhe Gjermanisë, të përforcuara nga diaspora jonë. Të dytin, ndryshimet gjeopolitike dhe ekonomike që e bëjnë Kosovën vend të përshtatshëm për nearshoring dhe përkushtimin tonë për demokraci dhe liri ekonomike. Dinamizmi ekonomik, gatishmëria për investime, rritja e Bruto Produktit Vendor dhe projektet e mëdha infrastrukturore, përfshirë ato në fushën e energjisë, i theksoi si faktor të tretë. Kurse sektorin e teknologjisë dhe atë të prodhimit, bashkë me përparësinë konkurrues dhe frymën innovative, si faktor të katërt”, ka njoftuar zyra e kryeministrit.

Ai i ftoi kompanitë që të eksplorojnë mundësitë që ofron Kosova dhe ta vizitojnë atë që të njëjtat t’i shohin nga afër.

(Kosova Sot Online)