Lajçak: Puna ime vazhdon dhe nuk do të shkoj askund

Nuk jam afër fundit të mandatit si i ngarkuar për t’u marrë me dialogun ndërmjet Kosovës dhe Serbisë, ka deklaruar i dërguari i posaçëm i Bashkimit Europian, Miroslav Lajçak, transmeton  gazeta "Kosova Sot Online".

“Puna ime vazhdon” dhe “nuk do të shkoj askund”, i tha ai platformës “sbunker”, ku tregoi se po punon për hapat e ardhshëm në procesin e dialogut.

“Ndoshta nuk jam aq afër fundit të mandatit tim sa mendohej fillimisht. Pra, ajo që mund të them është se puna ime vazhdon. Unë nuk do të shkoj askund së shpejti. Nuk jam ende në disponim për t’i dhënë këshilla pasuesit tim”, tha Lajçak.

Ai tha se pasuesi i tij në këtë detyrë do të vijë “herët a vonë”, por shtoi se “procesi nuk ka filluar ende”.

“Dhe pasi të zgjidhet pasardhësi, atëherë sigurisht që do të kemi shumë për të ndarë. Por për momentin, ka vetëm një Përfaqësues Special të BE-së dhe ju po flisni me të tani, dhe ekipi është këtu. Dhe, siç thashë, ne jemi vërtet plotësisht të fokusuar në punën tonë dhe përgatitjen e hapave tanë të ardhshëm”, tha Lajçak.

(Kosova Sot Online)