Pse mësimdhënsit po kërkojnë paga më të larta kur nxënësit nga Kosova janë më të dobëtit në rajon dhe ndër të fundit në botë?

Nxënësit e klasës së katërt në Kosovë kanë dalë në mesin e atyre që janë ranguar më së ulëti në botë për arritjet matematikore dhe shkencore, transmeton gazeta “Kosova Sot Online”.

Organizata Ndërkombëtare për Vlerësimin e Arritjeve Arsimore (IEA) ka publikuar studimin e fundit ndërkombëtar të njohurive në matematikë dhe shkencë të nxënësve në mbarë botën.

Nga 58 shtete pjesëmarrëse, Kosova është renditur në vendin e 47-të për njohuritë në matematikë, ndërsa në vendin e 55-të për njohuritë në shkencë.

Në rajon, vetëm nxënësit në Bosnjë e Hercegovinë qëndrojnë më keq sesa ata në Kosovë sa i përket njohurive në matematikë. Ndërkaq për njohuritë në shkencë, nxënësit kosovarë janë të fundit.

Nxënësit e Kosovës rangohen në pjesën e standardit të ulët, ku përfshihen ata nxënës në botë që thjesht “demonstrojnë të kuptuarit bazë matematikor”. Po në fund, rangohen edhe në mesin e atyre që thjesht “tregojnë dhe zbatojnë njohuritë e disa koncepteve shkencore”.

(Kosova Sot Online)