Sali Berisha kërkon zgjedhje të parakohshme

Kreu i Partisë Demokratike, Sali Berisha, në një deklaratë për mediat pas shpalljes së rezultateve zgjedhore, ka hedhur sërish poshtë legjitimitetin e procesit, duke e cilësuar atë si një farsë. Ai ka kërkuar zhvillimin e zgjedhjeve të parakohshme dhe krijimin e një qeverie teknike, transmeton gazeta “Kosova Sot Online”.

Berisha theksoi se kjo qeveri teknike duhet të ketë një agjendë të qartë që fokusohet në adresimin e problematikave që lidhen me integrimin evropian dhe garantimin e zgjedhjeve të lira dhe të ndershme.

“Kërkojmë zgjedhje të parakohshme dhe vetëm të parakohshme. Kërkojmë qeveri teknike me agjendë të përcaktuar, problemet që lidhen me procesin e integrimit dhe zgjedhje të lira e të ndershme. Kjo është kërkesa jonë, për të cilën do të luftojmë me të gjithë mbështetësit tanë dhe me miqtë tanë në Europë dhe botë”, tha kreu i PD, Berisha.

(Kosova Sot Online)