Këta janë më të dëmtuarit nga manipulimi me vota
Arian Tahiri, kandidat për deputet nga radhët e Partisë Demokratike të Kosovës, pësoi më së shumti nga manipulimi me vota.
Tahirit, nga rinumërimi i votave deri më tani, i janë rikthyer 878 votat e vjedhura.
Më së shumti vota, nga të dhënat e KQZ-së deri në orën 16, përveç Tahirit te PDK-ja u janë vjedhur edhe tre kandidatëve të tjerë për deputetë: Uran Ismailit 663 vota, Përparim Grudës 567 vota e Abelard Tahirit 499 vota.
E nga LDK-ja, më së shumti vota iu vodhën Paris Gurit, gjithsej 429.
Top pesëshen e kandidatëve për deputetë nga radhët e LDK-së, që pas rinumërimit iu kthyen votat e vjedhura, e plotësojnë Ukë Rugova me 189 vota, Armend Zemaj me 137, Festim Kabashi me 126 vota e Jasemin Bujari me 121.
Kurse, më të dëmtuarit nga radhët e Lëvizjes Vetëvendosje janë Alban Bajrami me 298 vota të vjedhura e Hajrullah Ceku me 252 vota. Bajramin e Çekun e pasojnë Shqipe Mehmeti-Selimi me 171 vota, Fatos Geci me 170 vota e Arben Vitia me 155.
Në Aleancën për Ardhmërinë e Kosovës, më së shumti vota i janë vjedhur Agim Çekut – 98 sosh. Ai pasohet nga Daut Haradinaj me 50 vota të vjedhura, Arton Demhasaj me 43 e Diellza Kukaj me 37.
Deri pasditen e së hënës, sipas Komisionit Qendror të Zgjedhjeve, janë rinumëruar 69.18 për qind e 2 mijë e 557 vendvotimeve.
E zëdhënësi i KQZ-së, Valmir Elezi, tha se planifikojnë që i gjithë procesi i rinumërimit të përmbyllet deri të shtunën.
Por sipas Elezit, shpallja e rezultateve përfundimtare e certifikimi i tyre varet nga procese të tjera.
“Mbetet të shihen nëse do të ketë fillimisht ankesa dhe pastaj natyra e tyre dhe sigurisht edhe vendimmarrja e institucioneve që i ankojnë këto ankesa, PZAP dhe Gjykata Supreme. Se sa kohë pastaj i duhet KQZ-së për të certifikuar rezultatin përfundimtar të zgjedhjeve nga shpallja e tij kjo varet krejtësisht nga ankesat që paraqiten në këto institucione dhe vendimmarrja e tyre”, tha Elezi.
Gjetjet gjatë rinumërimit të disa vendvotimeve bënë që KQZ-ja të vendosë për hapjen e të gjitha kutive të votimit. Nga hetimet e deritanishme të zhvilluara nga Prokuroria në Prizren, 22 komisionerëve e një vëzhguesi u është caktuar paraburgim prej një muaji.
(Kosova Sot Online)
