Mësimdhënësit protestojnë: Po ofendohemi e sulmohemi fizikisht nga nxënësit

Në Shkollën Fillore dhe të Mesme të Ulët “Pavarësia” në Prishtinë, sot nuk nisi mësimi si zakonisht. Mësimdhënësit po protestojnë gjatë dy orëve të para, si reagim, siç kanë thënë ata, ndaj veprimeve delikuente të nxënësve në procesin edukativo-arsimor, përfshirë dhunën fizike, fyerjet, ofendimet dhe sharjet ndaj mësimdhënësve.

Përmes një reagimi publik, Shoqata Sindikale e kësaj shkolle ka bërë të ditur se protesta organizohet si reagim ndaj veprimeve delikuente të nxënësve në procesin edukativo-arsimor, përfshirë dhunën fizike, fyerjet, ofendimet dhe sharjet ndaj mësimdhënësve.

Sipas njoftimit, pas përfundimit të protestës, procesi mësimor do të vazhdojë normalisht nga ora e tretë, sipas orarit të rregullt mësimor.

Në mbështetje të kësaj proteste ka dalë edhe Sindikata e Bashkuar e Arsimit, Shkencës dhe Kulturës (SBASHK), e cila ka kërkuar reagim të menjëhershëm nga institucionet përgjegjëse për të garantuar një ambient të sigurt dhe respektues për mësimdhënësit.

Ndërkohë, autoritetet kanë ndaluar për 48-orë një mësimdhënës të shkollës “Pavarësia”, i cili dyshohet se ka ushtruar dhunë brutale ndaj një nxënësi të hënën në këtë shkollë. Ndërkaq nxënësi e ka goditur me shkelm.

Kurse sipas psikologut të “Pavarësisë”, ishin rreth 10 nxënës që kishin rrethuar arsimtarin dhe e kishin sharë e ofenduar.

Kolegët e këtij mësimdhënësi, para mediave dhanë mesazhin e tyre, dhe kërkuan masa konkrete për mbrojtjen ndaj tyre dhe garantim të rendit në institucionet arsimore.

“Kërkojmë masa konkrete, të qarta dhe të zbatueshme për mbrojtjen e mësimdhënësve dhe garantimin e rendit në institucionet arsimore. Mesazhi ynë është i qartë, jemi kundër dhunës, jemi për rend, disiplinë dhe respekt në shkollë”, tha njëri nga kolegët e mësimdhënësit që u ndalua për 48-orë për dhunë ndaj një nxënësi.

Komunikata e plotë:

DEKLARATË E PËRBASHKËT PËR MEDIA

Shoqata Sindikale e ShFMU “Pavarësia”

Këshilli Drejtues i Shkollës

Këshilli i Prindërve

09.02.2026

Shoqata Sindikale e ShFMU “Pavarësia”, Këshilli Drejtues i Shkollës dhe Këshilli i Prindërve njoftojnë opinionin publik se më 10.02.2026, në ora 08:00, të gjithë mësimdhënësit do të jenë të pranishëm në shkollë.

Dy orët e para mësimore nuk do të zhvillohet mësim, pasi do të mbahet protestë. Procesi mësimor do të vazhdojë rregullisht pas përfundimit të dy orëve të para, përkatësisht nga ora e tretë, sipas orarit të rregullt. Ndërrimi i pasdites do ta zhvillojë procesin edukativo-arsimor normalisht, sipas orarit të paraparë.

Qëllimi i kësaj proteste është reagimi kundër veprimeve delikuente të nxënësve në procesin edukativo-arsimor, duke përfshirë dhunën fizike, fyerjet, ofendimet dhe sharjet ndaj mësimdhënësve. Këto veprime cenojnë rëndë autoritetin profesional, sigurinë dhe dinjitetin e mësimdhënësit, si dhe dëmtojnë mbarëvajtjen e procesit mësimor.

Theksojmë se ky nuk është një rast i izoluar, por një fenomen shqetësues që po shfaqet në shumë shkolla. Përmes kësaj proteste synojmë të ngrisim zërin kundër këtij fenomeni dhe të kërkojmë angazhim serioz institucional dhe shoqëror për ta parandaluar dhe trajtuar me përgjegjësi.

Shoqata Sindikale

Këshilli Drejtues i Shkollës

Këshilli i Prindërve

ShFMU “Pavarësia”

(Kosova Sot Online)