Trump i shkruan Vjosa Osmanit: Mezi pres ta vazhdoj bashkëpunimin me ju

Ish-presidentja e Kosovës, Vjosa Osmani, ka bërë të ditur se mbrëmë ka pranuar një letër nga Presidenti i Shteteve të Bashkuara të Amerikës, Donald J. Trump, në përfundim të mandatit të saj.

Osmani ka theksuar se letra përmban vlerësim për punën dhe lidershipin e saj gjatë kohës në detyrë, si dhe një mesazh të qartë për vazhdimin e bashkëpunimit ndërmjet Kosovës dhe SHBA-ve.

Në letrën e tij, Presidenti Trump shpreh mirënjohje për bashkëpunimin e deritanishëm dhe nënvizon se pret me padurim forcimin e mëtejshëm të marrëdhënieve në vitet në vijim. Ai vlerëson rolin e Kosovës në promovimin e paqes dhe stabilitetit, si dhe partneritetin e qëndrueshëm me Shtetet e Bashkuara.

Osmani, nga ana e saj, ka falënderuar Presidentin amerikan për letrën dhe mbështetjen, duke ritheksuar se lidhja ndërmjet Kosovës dhe SHBA-ve mbetet e fortë dhe e qëndrueshme.

“Lidhjen e fortë të Kosovës me Amerikën do ta ruajmë bashkë, sot e përherë”, ka deklaruar ajo, duke shtuar se mirëpret vazhdimin e bashkëpunimit në të ardhmen.

Letra e plotë e publikuar nga Osmani:

Faleminderit për letrën tuaj shumë dashamirëse. Vazhdon të admiroj lidershipin tuaj të guximshëm dhe vendimtar në emër të popullit të Kosovës.

Kemi arritur shumë së bashku në një periudhë të shkurtër kohore—veçanërisht bashkëpunimin tonë në kuadër të Bordit të Paqes. Pjesëmarrja e Kosovës në këtë nismë të re premtuese do të luajë një rol të jashtëzakonshëm në përfundimin e konflikteve në mbarë botën, duke promovuar njëkohësisht lirinë dhe mirëqenien për të dy popujt tanë.

Ndërsa së shpejti do të largoheni nga detyra, ju do të lini pas një trashëgimi të rëndësishme që do të formësojë të ardhmen e vendit tuaj, rajonit të Ballkanit, dhe gjithë Evropës. Ju keni qenë gjithmonë një mike dhe partnere e besueshme e Shteteve të Bashkuara, dhe mezi pres vazhdimin e bashkëpunimit tonë në vitet në vijim.

Zonja e Parë më bashkohet në përcjelljen e urimeve tona më të mira për suksesin tuaj të mëtejshëm.

Sinqerisht,

Donald J. Trump
President i Shteteve të Bashkuara të Amerikës

(Kosova Sot Online)