Regjimi i Vuçiqit nis frikësimin e dëshmitarëve dhe kritikëve

Regjimi i Aleksandar Vuciq po akuzohet se po përdor një fushatë propagandistike dhe presion institucional për të zhvendosur vëmendjen nga pretendimet për përdorimin e armës zanore ndaj protestuesve më 15 mars 2025 në Beograd.

Sipas revistës serbe Radar, autoritetet serbe, në vend që të ofrojnë shpjegime për atë që mijëra qytetarë thanë se përjetuan gjatë protestës së madhe kundër qeverisë, po e paraqesin ngjarjen si një mashtrim të organizuar nga studentët dhe kundërshtarët e pushtetit. Artikulli e cilëson këtë qasje si përpjekje për të kthyer viktimat në të dyshuar dhe për të krijuar një narrativë të rreme për “komplot” kundër shtetit.

Në qendër të zhvillimeve të fundit është analisti ushtarak Aleksandar Radiq, banesa e të cilit u kontrollua nga policia, ndërsa ai u shoqërua për intervistim nën dyshimet për vepra kundër rendit kushtetues dhe sigurisë së vendit. Sipas Radar, Radiq kishte qenë prej muajsh objekt presioni për shkak të deklarimeve të tij publike mbi përdorimin e mundshëm të armës zanore.

Presion është raportuar edhe ndaj gazetarëve. Kryeredaktori i agjencisë Beta, Vojkan Kostiq, u thirr nga policia pasi Radiq kishte dhënë deklaratë për këtë medium. Kostiq e ka cilësuar veprimin si përpjekje për frikësimin e mediave dhe ka thënë se autoritetet po reagojnë ndaj temës së “topit zanor” në mënyra që, sipas tij, nuk kanë lidhje me ligjin apo gazetarinë.

Artikulli shkruan se strategjia e regjimit synon të lodhë dhe të çorientojë opinionin publik: në vend të një hetimi të qartë mbi incidentin e 15 marsit, hapësira mediatike po mbushet me akuza ndaj studentëve, ekspertëve, gazetarëve dhe kritikëve të pushtetit. Kjo, sipas burimeve të Radar, synon të krijojë frikë dhe të pengojë diskutimin publik për përgjegjësinë e institucioneve.

Ish-presidenti serb Boris Tadiq ka reaguar duke akuzuar prokurorinë për ndjekje politike të atyre që flasin për përdorimin e armës zanore. Ndërkohë, Komiteti Civil i Qendrës së Beogradit për Politikë të Sigurisë ka shprehur shqetësim se masat ndaj ekspertëve dhe gazetarëve mund të kenë efekt frikësues dhe të kufizojnë debatin publik mbi çështje me interes të gjerë.

(Kosova Sot Online)