E thotë analisti: Nëse një qytetar është prangosur çdo përdorim force pas këtij momenti përbën shkelje të drejtave themelore të njeriut

Shkruan: ANALISTI-Qani Shabani

Sa i përket rastit tragjik të Agon Zejnullahut, ekspertiza mjekoligjore dhe analizat forenzike duhet të ndriçojnë një rast që nuk mund të mbyllet me një emërtim formal si “pakujdesi”, kur në mes është një jetë e humbur gjatë një procedure zyrtare.

Lexoni edhe:

Alarmon analisti: Nëse vërtetohet se Agon Zejnullahu është keqtrajtuar deri në vdekje, atëherë ndodhemi përballë një rasti të ‘vrasjes shtetërore’

-Në Lipjan, Policia e Kosovës ndërhyri pas raportimeve për një qytetar që po shqetësonte kalimtarët me automjet. Personi në fjalë, 27-vjeçari Agon Zejnullahu, u ndalua, iu vendosën prangat dhe, sipas raportimeve të mëvonshme, ndërroi jetë në vendin e ngjarjes. Deri më tani, Prokuroria ka konfirmuar arrestimin e pesë zyrtarëve policorë nën dyshimin për veprën penale “vrasje nga pakujdesia”.

Megjithatë, ky rast ngre shumë më tepër pyetje sesa përgjigje.

A mjafton akuza për “pakujdesi” në një rast me pasoja fatale?

Sipas deklarimeve të familjes së të ndjerit, Agoni kishte shenja të dukshme dhune në fytyrë dhe trup. Ata pretendojnë se posedojnë video ku dëgjohet zëri i tij në frymëmarrje të rënduar, ndërsa goditet nga zyrtarët policorë. Këto pretendime, së bashku me mungesën e një komunikimi të plotë nga institucionet, e bëjnë të domosdoshme një analizë më të thelluar kriminalistike dhe mjekoligjore.

Bazuar në hetimet e vdekjeve gjatë ndalimit zyrtar, ky rast kërkon:

Autopsi të pavarur, për të përcaktuar me saktësi shkakun e vdekjes dhe për të hetuar praninë e traumave fizike apo dëmtimeve të organeve jetësore.

Analizë kohore forenzike, për të ndërlidhur momentin e përdorimit të forcës me momentin e vdekjes.

Verifikim të pamjeve filmike, për të sqaruar veprimet e zyrtarëve në çdo sekondë të ndërhyrjes.

Raport toksikologjik të detajuar, që mund të ndihmojë në identifikimin e çdo faktori shëndetësor që mund të ketë ndikuar, por pa e përjashtuar rolin e dhunës së mundshme.

Në mungesë të këtyre elementeve, çdo përfundim zyrtar është i pamjaftueshëm për të siguruar transparencë dhe drejtësi.

Sipas Ligjit për Policinë e Kosovës dhe udhëzimeve për përdorimin e forcës, çdo ndërhyrje duhet të jetë:

Proporcionale me rrezikun, që do të thotë se forca përdoret vetëm nëse personi paraqet kërcënim aktiv dhe të menjëhershëm.

E dokumentuar plotësisht, përmes kamerave trupore dhe raporteve të shkruara.

E ndjekur nga ndihmë mjekësore, posa ndalohet subjekti, veçanërisht nëse ka humbje vetëdijeje, gjakderdhje apo frymëmarrje të vështirësuar.

E kontrolluar nga zinxhiri komandues, me përgjegjësi të qarta për çdo vendim dhe veprim.

Nëse një qytetar është prangosur dhe vendosur në tokë, çdo përdorim force pas këtij momenti është i pajustifikueshëm dhe përbën shkelje të drejtave themelore të njeriut.

Ky rast është më shumë sesa një çështje penale kundër pesë zyrtarëve. Ai teston funksionimin e të gjithë sistemit: nga profesionalizmi i forcave të rendit, te reagimi i zinxhirit komandues dhe mekanizmat mbikëqyrës të drejtësisë.

Shkrimet në këtë rubrikë nuk shprehin qëndrimet e gazetës "Kosova Sot Online".