Dimal Basha do ta ketë të vështirë drejtimin e Kuvendit, duke pasur parasysh mungesën e konsensusit politik

Shkruan: ANALISTI-Eshref Ymeri

Gjatë qeverisjes së Vetëvendosjes, Dimal Bashës nuk ia kemi dëgjuar ndonjëherë zërin të përplasej me mercenarët e Serbisë fashiste, të emëruar si misionarë-ndërmjetës nga Brukseli dhe Uashingtoni, vetëm për mbrojtjen e interesave të saj, kundër interesave kombëtare të Republikës së Dardanisë.

Lexoni edhe:

Aleksandar Vuçiq është prodhim politik i Sheshelit dhe Millosheviçit

-Së pari, zgjedhja e Dimal Bashës në krye të Kuvendit nuk është rezultat i konsensusit për të mirën e vendit; është thjesht një pazar politik.

Së dyti, Dimal Basha nuk është autoritet politik; për pasojë, nuk do të jetë në gjendje ta ruajë autoritetin dhe pavarësinë e Kuvendit, dhe nënkuptohet që do të mbetet nën hijen e Vetëvendosjes dhe të liderit të saj.

Së treti, Dimal Basha do ta ketë të vështirë drejtimin e Kuvendit, duke pasur parasysh mungesën e konsensusit politik. Ai është vërtet një intelektual i përgatitur në fushën e jurisprudencës dhe të marrëdhënieve ndërkombëtare, por nuk ka një karrierë të pasur politike brenda Republikës së Dardanisë. Në këto kushte, karriera e tij teknike është e pamjaftueshme për drejtimin e Kuvendit.

Së katërti, është e vështirë të besohet se drejtimi i Kuvendit do të ecë normalisht; prandaj, Dimal Berisha nuk duhej zgjedhur në krye të tij.

Lind pyetja vetvetiu: Si shpjegohet që disa deputetë të Partisë Demokratike votuan pro kandidaturës së Vetëvendosjes? Mos vallë votuan nisur nga interesat e vendit? Kjo është e pabesueshme. Sepse Partia Demokratike është partia e Thaçit, e kryetradhtarit të Republikës së Dardanisë; është partia-agjenturë e Serbisë fashiste, ashtu si dikur edhe Partia Komuniste e Shqipërisë, me kryeargatin e titizmit, Enver Hoxha, në krye — dhe sot Partia Socialiste, me në krye po një kryetradhtar të Republikës së Shqipërisë, kryeargat të vuçizmit dhe armik të popullit dardan, me emrin Edi Rama.

Po atëherë, cila paska qenë arsyeja që deputetët e partisë thaçiste votuan pro Dimal Bashës?

Pikërisht në votën e atyre deputetëve fshihet hileja, aty fle lepuri. Mos vallë ata, nga dragonj thaçistë, na qenkan shndërruar në engjëj? Është e pamundur. Sepse Thaçi dhe partia e tij, siç e kanë treguar faktet konkrete, janë djaj të rrezikshëm për Republikën e Dardanisë. Tradhtia është vulosur si damkë e zezë në ballin e Thaçit dhe të anëtarëve të partisë së tij me bashkësinë e komunave serbe (të ashtuquajturin Asociacion) dhe Veriun e Mitrovicës. Me këtë tradhti ndaj Republikës së Dardanisë, Thaçi dhe partia e tij dëshmuan para popullit dardan pabesinë, pangopësinë dhe tradhtinë e tyre. Në rastin e votimit pro kandidaturës së Dimal Berishës, partia e Thaçit zhveshi lëkurën e djall-dragoit dhe veshi mantelin e engjëllit. Por jeta ka vërtetuar se, nëse ekziston djalli në këtë botë, atëherë ai nuk paraqitet si ndonjë cjap me brirë – ai është një dragua me tri koka. Dhe këto koka, në rastin konkret, janë dhelpëria, babëzia dhe tradhtia. Dhe në qoftë se njëra nga këto koka do ta “kafshojë” Kryeministrin Albin Kurti, atëherë dy të tjerat do ta “përpijnë” krejt, me gjithë kocka.

Me votën pro të deputetëve të vet, Thaçi dhe partia e tij kanë për qëllim që Vetëvendosjes dhe Kryeministrit Albin Kurti t’ua mbajnë mbi krye shpatën e Damokleut – rrezikun për kriza politike, me bllokim të vendimeve që duhet të marrë Kuvendi për funksionimin normal të të gjitha strukturave shtetërore. Kësisoj, për sabotimin e qeverisjes së Vetëvendosjes. Pikërisht ky është misioni i tyre, si agjentë të Serbisë fashiste.

Faji është i asaj pjese të votuesve dardanë që i dhanë vota partisë së tradhtisë thaçiste, duke mos e lejuar Vetëvendosjen të kishte shumicën në ulëset e Kuvendit.

Votuesit dardanë duhet ta kenë parasysh se Vetëvendosja është i pari formacion politik në mbarë historinë e kombit shqiptar, i cili, në krahasim me të gjitha partitë e tjera politike, ka mbajtur lart dhe ka mbrojtur me vendosmëri dinjitetin tonë kombëtar, pa pranuar kurrë ndonjëherë të marrë përsipër rolin e servil-mercenarizmit në shërbim të të huajve. Është pikërisht Vetëvendosja dhe Albin Kurti në krye të saj, si edhe Presidentja Vjosa Osmani, të cilët, gjatë dialogut me Beogradin, u kanë treguar vendin mercenarëve të Serbisë fashiste, si Borelli, Lajçaku, Grenelli, Eskobari etj., të cilët kërkonin krijimin e Asociacionit. Kryeministri Albin Kurti, qeveria e tij dhe Presidentja Vjosa Osmani jo vetëm që nuk lejuan krijimin e një tjetër mikroshteti serb brenda Republikës së Dardanisë, por vendosën edhe kontrollin e plotë mbi të gjithë territorin e saj. Prandaj meritojnë mirënjohjen më të thellë nga ana e të gjithë shqiptarëve me vetëdije të lartë kombëtare, jo vetëm në trojet tona etnike, por edhe në diasporë.

Shkrimet në këtë rubrikë nuk shprehin qëndrimet e gazetës "Kosova Sot Online".