Dilema 'hamletiane' për kryekuvendarin e Kosovës – Dimal Basha

Shkruan: ANALISTI- Fadil Maloku

Problematika e autorësisë së Dimal Bashës në shkrimin e tij mbi “Fundamentalizmin islam…” dhe fyerjet që ai i bë UÇK-s të botuar në vitin 2012, ka ngjallur kohët e fundit shumë debate, sidomos morale, shkencore dhe politike. Pyetja kryesore që lind është: a duhet që një person, që sot është njeriu i dytë më i pushtetshëm në Republikë, të amnestohet apo të denigrohet publikisht? Kjo çështje ngre një varg dilemesh sociologjike.

Së pari, si kryekuvendar – jo thjesht si autor i shkrimit – ai bart një seri disonancash simbolike. Roli i tij aktual bie ndesh me të kaluarën akademike, sepse shkrimi dhe narracioni mbi financimin, gjykimin mbi kredencialet paragjykuese të UÇK-së dhe interpretimet e tjera blasfemuese kanë kontribuar, me ose pa vetëdije, në stigmatizimin e Ushtrisë Çlirimtare të Kosovës në publikun ndërkombëtar. Kjo situatë bëhet veçanërisht problematike pas përfundimit të luftës, kur procesi i “pacifikimit” dhe rehabilitimit të UÇK-së po monitorohej nga mekanizmat e sigurisë të NATO-s. Në këtë prizëm, kredibiliteti publik dhe kapitali simbolik i Bashës si kryekuvendar – pra përfaqësues i një prej institucioneve më vitale të Republikës – duhet të vihet në pikëpyetje!

Së dyti, nga këndvështrimi i stabilitetit institucional, publiku dhe partitë politike, përfshirë subjektin nga i cili vjen ai, mund të zgjedhin të amnistojnë veprimin e tij për të shmangur ngërçin politik dhe për të garantuar funksionimin e institucioneve. Mirëpo, nëse Basha nuk ofron një shpjegim të qartë, të besueshëm dhe transparent mbi kontekstin e publikimit të shkrimit të lartëcekur, krijohet një huti publike dhe një deficit i gjerë komunikativ që e dobëson demokracinë ende të brishtë në Kosovë.

Andaj dilema që shtrohet është: a mund të mbrojë interesin e Republikës së Kosovës një individ me kaq fuqi e pushtet vendimarrës, i cili në të kaluarën ka kontribuar, me shkrimin e tij, në vendosjen e institucioneve dhe vlerave të UÇK-së në një kontekst paragjykues, ku ato perceptohen si të komprometuara? Për mua, kjo është pyetja që qytetarët duhet t’i kërkojnë përgjigje këtij “parashutisti” politik.

Thënë më ndryshe, Basha ndodhet në një pozitë ku përfaqësimi i tij si kryekuvendar bie ndesh edhe me përfaqësimin akademik të mëhershëm. Publiku, mediet dhe qytetaria duhet të jenë kureshtarë dhe vigjilentë ndaj këtij transformimi kaq të shpejt, ku ai prej qasjes akademike, që mund të jetë stimuluar nga qarqet antishqiptare, po shndërrohet në një avokat të interesave të Republikës!? Për një vend të vogël si Kosova, kjo narrativë nuk mund të kalojë pa u diskutuar dhe pa u hetuar mirë nga mediet dhe inatitucionet relevante të sigurisë.

Pra, nëse ndodh heshtja apo amnistimi publik ajo duhet të varet shumë nga aftësia e tij për të shpjeguar, justifikuar ose distancuar veprën e tij akademike në raport me detyrën e kryekuvendarit. Në të kundërt, jam i bindur se Vetëvendosja do të paguajë koston më të lartë. Dhe nëse zvarritja e konstituimit të Parlamentit është bërë me qëllime taktizuese dhe të krijimit të një avantazhi elektoral në zgjedhjet e ardhshme të jashtëzakonshme në horizont, atëherë kjo ka qenë një gabim i madh strategjik dhe një “investim” i kotshëm elektoral..

Shkrimet në këtë rubrikë nuk shprehin qëndrimet e gazetës "Kosova Sot Online".