Politika shqiptare me çmendurinë e saj, po e rrezikon ardhmërinë

Shkruan: Ismail Muçiqi

Jemi në një kohë tepër kritike, në një periudhë ku sferat e interesit të fuqive të mëdha po rreshtohen duke shkatërruar rendin botëror dhe globalizmin, gjithmonë në ndjekje të interesave strategjike dhe resurseve ekonomike anembanë planetit. Politika Shqiptare, me çmendurinë e saj, po e rrezikon ardhmërinë e Shqiptarëve në të gjitha trojet etnike. Lufta për pushtet është shndërruar në kauzë – nga familja e deri në majë të piramidës – vetëm për bajraktarizëm. Politika e verbër që manifestohet nëpër partitë politike, kudo që bëjnë politikë Shqiptarët, po e kthen historinë mbrapa më shumë se një shekull, duke na rikthyer tek planet fisnore që dikur sundonin mbi popullin e prapambetur dhe të pashkolluar. Uverturat me të cilat po ballafaqohet populli, duke parë mjerimin e partive politike, liderëve dhe grupeve të interesit për pushtet, janë të dhimbshme dhe po krijojnë përçarje e destabilitet në të gjitha trojet Shqiptare.

Luftrat dhe konfliktet që po zhvillohen në krizat e ndryshme të botës, e që po zgjerohen gjithnjë e më shumë, sinjalizojnë se rendi botëror po tundet dhe e ardhmja e sigurisë globale është e paparashikueshme. Deputetët e Parlamentit të Kosovës, në vend që të rrisin vetëdijen për të ndërtuar shtetin më të ri – Republikën e Kosovës – me çmenduritë e tyre po e rrezikojnë atë në çdo anë. Fajtorë kryesorë për këto fenomene janë vetëm “elitat politike”, të cilat me plot konspiracione dhe intriga krijojnë afera kundër njëra-tjetrës vetëm që me çdo kusht të marrin pushtetin. Kjo gjendje po shihet hapur në Kosovë, ku Serbia, përmes Listës Serbe dhe instrumenteve tjera destruktive, ka futur pykat për t’i përçarë dhe shpartalluar Shqiptarët.

E njëjta situatë po vazhdon edhe në Republikën e Shqipërisë, ku droga, krimi, prostitucioni, kriminaliteti dhe shumë dukuri tjera negative po ia zënë frymën këtij vendi. Protagonist i kësaj politike mafioze është Kryeministri Edi Rama. Këtë valle po e vazhdojnë edhe politikanët Shqiptarë në Maqedoninë e Veriut, të cilët janë ndarë dhe përçarë në blloqe partiake, duke u bërë mollë sherri për perspektivën dhe progresin e Shqiptarëve që jetojnë në trojet e tyre etnike atje. Duhet theksuar se pjesë e këtij brumi famëkeq, që flet në emër të Shqiptarëve, është edhe palaqo Dritan Abazoviq, i cili ka qenë Kryeministër i Malit të Zi. Ky politikan, në vend që të angazhohej për avancimin e të drejtave të Shqiptarëve në Mal të Zi, me veprimet e tij politike e riktheu ndikimin e politikës serbe dhe të Kishës Ortodokse Serbe në këtë vend. Këto janë fenomenet e kohës, të cilat po e ngulfatin dhe po e shkatërrojnë vizionin dhe idealet e Shqiptarëve për të ecur përpara. E këtë po e bëjnë njerëzit (politikanët) me sëmundje patologjike për ta grabitur pushtetin.

Shkrimet në këtë rubrikë nuk shprehin qëndrimet e gazetës "Kosova Sot Online".